កុមារីនៅខេត្តព្រៃវែងម្នាក់ ស្លា.ប់ដោយសារផ្តាសាយបក្សីសង្ស័យឆ្លងពីសត្វ
ព្រៃវែង៖ កុមារីម្នាក់បានស្លាប់ ថ្ងៃទី២២ ខែកុម្ភ: ឆ្នាំ២០២៣ ខណៈមន្ទីរពេទ្យបញ្ជាក់ថា រូបគេមានវិជ្ជមានមេរោគផ្តាសាយបក្សី H5N1។ លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធ និងជំងឺឆ្លង បានឱ្យដឹងថាកុមារីអាយុ១១ឆ្នាំ ៦ខែ រស់នៅភូមិ រលាំង ឃុំ រំលេច ស្រុកស៊ីធរកណ្តាល ខេត្តព្រៃវែង ចាប់ផ្ដើមឈឺនៅថ្ងៃទី១៦ ខែកុម្ភៈ ឆ្នាំ២០២៣ ដោយមានរោគសញ្ញាគ្រុនក្ដៅ ៣៩អង្សាសេ ព្រមទាំងមានក្អក ឈឺក។ ក្រោយព្យាបាលនៅមូលដ្ឋានមិនធូរស្រាល ដោយកុមារីចាប់ផ្ដើមហត់ក៏ត្រូវបានបញ្ជូនព្យាបាលនៅមន្ទីរពេទ្យកុមារជាតិនៅភ្នំពេញ។ នៅថ្ងៃទី២១ ខែកុម្ភៈ ឆ្នាំ២០២៣ គ្រូពេទ្យព្យាបាលបានយកវត្ថុផ្ញើមកវិទ្យាស្ថានជាតិសុខភាពសាធារណ: រួចទទួលលទ្ធផល ថ្ងៃបន្ទាប់បានបញ្ជាក់ថាវិជ្ជមានមេរោគផ្តាសាយបក្សី H5N1 ចំណែកកុមារីបានបាត់បង់ជីវិតហើយ។ លោកវេជ្ជបណ្ឌិត ថ្លែងដូច្នេះថា៖ «យើងនឹងអង្កេតជាបន្តទៀតថាតើកុមារីឆ្លងជំងឺនឹងឆ្លងប្រភពមកពីណាហើយនរណាទៀតឈឺត្រូវយកឈាម និងសំណាកទៅមើលជាបន្តទៀត និងរង់ចាំលទ្ធផលពីពេទ្យសត្វទាំងពេទ្យសត្វស្រុក និងសត្វព្រៃទៀតតែសំខាន់ឃើញថាសត្វព្រៃងាប់ខុសពីធម្មតា។ អ៊ីចឹងយើងសង្ស័យគាត់អាចប៉ះពាល់សត្វព្រៃទើបធ្វើឱ្យគាត់ឆ្លងបាន»។ លោកវេជ្ជបណ្ឌិត ក៏បានអំពាវនាវបងប្អូនកុំប៉ះពាល់សត្វឈឺឬងាប់ ទាំងសត្វបក្សីស្រុកនិងបក្សីព្រៃ អ្នកសង្ស័យសូមពិគ្រោះជំងឺជាមួយគ្រូពេទ្យ ឬរាយការណ៍ទៅលេខ ១១៥៕ សម្រួលដោយ ទៀង បុណ្ណរី
