ផ្អើលអស់ពលរដ្ឋក្បែរខាងទាំងយប់! អគ្គិភ័យឆាបឆេះចម្ការស្វាយអស់ជិត៤ហិកតា

ខេត្តបន្ទាយមានជ័យ៖ អគ្គិភ័យបានឆាបឆេះចម្ការស្វាយមួយកន្លែងយ៉ាងសន្ធោសន្ធៅ នៅខាងត្បូងផ្លូវជាតិលេខ៥ អស់ប្រហែល៤ហិកតា ស្ថិតនៅក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត។ ហេតុការណ៍បង្កការភ្ញាក់ផ្អើលនេះកើតឡើងកាលពីយប់ថ្ងៃទី២០ ខែកុម្ភៈ ឆ្នាំ២០២៣នេះ…។  អភិបាលក្រុងប៉ោយប៉ែត លោក គាត ហ៊ុល បានឱ្យដឹងថា ករណីអគ្គិភ័យដែលបានឆាបឆេះរាលដាលពាសពេញព្រៃចម្ការស្វាយនេះ គឺឆេះអស់រយៈពេលជាងបីម៉ោង ទើបកម្លាំងជំនាញអាចគ្រប់គ្រងស្ថានការបាន ពោលឆេះចាប់ពីម៉ោង៩យប់ រហូតមកដល់ម៉ោង១១:៣០​នាទី​យប់។ ក្នុងនោះកម្លាំងជំនាញបានប្រើប្រាស់រថយន្តពន្លត់អគ្គិភ័យ នៃអធិការដ្ឋាននគរបាលក្រុងប៉ោយប៉ែត និងរថយន្តពន្លត់អគ្គិភ័យក្រុមហ៊ុនកាស៊ីណូ អស់ប្រមាណ៤ ទៅ៥ គ្រឿងធ្វើការបាញ់ពន្លត់ ទើបអាចគ្រប់គ្រងស្ថានការណ៍បាន ដែលមិនបណ្តាលឱ្យឆាប់ឆេះរាលដាលដល់ផ្ទះប្រជាពលរដ្ឋ​នោះទេ។  ចំពោះមូលហេតុនៃការឆាបឆេះលឿនបែបនេះ ដោយសារចម្ការស្វាយដែលមានព្រៃ និងស្មៅងាប់ច្រើនគួបផ្សំ អាកាសធាតុក្ដៅផង ទើបបណ្តាលអគ្គិភ័យងាយឆាបឆេះរាលដាលយ៉ាងលឿនបែបនេះ។ ដោយឡែកចំពោះករណីនេះកម្លាំងជំនាញ នៅមិនទាន់អាចបញ្ជាក់ពីមូលហេតុនៃការឆាបឆេះនៅឡើយទេ។ ជាមួយគ្នានេះដែរ លោកអភិបាលក្រុង ក៏ថ្លែងអំណគុណចំពោះកងកម្លាំងទាំងបីស្ថាប័ន និងក្រុមរថយន្តពន្លត់អគ្គិភ័យដែលបានជួយអន្តរគមន៍បាញ់ពន្លត់ក្នុងករណីនេះទាន់ពេលវេលា បើគ្រប់គ្រងមិនបានទាន់ពេលវេលានោះទេ នឹងអាចប៉ះពាល់ដល់លំនៅដ្ឋានរបស់ពលរដ្ឋដែលនៅក្បែរនោះជាក់ជាមិនខាននោះទេ…៕    សម្រួលដោយ  ទៀង បុណ្ណរី