ឆ្នាំ ២០២២ បាតុភូតរន្ទះបាញ់បណ្ដាលឲ្យមនុស្សស្លាប់ និងរបួសជាង ១២០ នាក់ ថយចុះជាងឆ្នាំមុន
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍កាលពីព្រឹកថ្ងៃទី ១០ មករានេះថា នៅឆ្នាំ ២០២២ បាតុភូតរន្ទះបាញ់ បានបណ្ដាលឲ្យមនុស្សស្លាប់ និងរបួសប្រមាណជាង ១២០ នាក់ និងងាប់គោក្របី ៩០ ក្បាល មានការថយចុះ បើប្រៀបធៀបនឹងឆ្នាំ ២០២១ កន្លងទៅ។ លោកបានបន្តថា ឆ្នាំ ២០២២ រន្ទះបាញ់ បានកើតឡើងចំនួន ១១០ លើក បណ្ដាលឲ្យខូចខាតផ្ទះសម្បែង ២៣ ខ្នង ស្លាប់មនុស្ស ៦៣ នាក់ និងរងរបួស ៥៨ នាក់ ព្រមទាំងងាប់គោក្របី ៩០ ក្បាល។ លោកបានបន្តទៀតថា ចំនួននេះបើប្រៀបធៀបទៅនឹងឆ្នាំ ២០២១ កន្លងទៅ ឃើញថា មានការថយចុះ ខណៈឆ្នាំមុនរន្ទះបាញ់បានកើតឡើងចំនួន ១១៨ ខូចខាតផ្ទះ ១៤ ខ្នង បណ្ដាលឲ្យមនុស្សស្លាប់ ៨៣ នាក់ រងរបួស ៥០ នាក់ និងងាប់គោក្របី ៥៧ ក្បាល។ លោក សុទ្ធ គឹមកុលមុនី បានបន្ថែមថា ក្នុងការទប់ស្កាត់បញ្ហារន្ទះបាញ់នេះ គណៈកម្មាធិការជាតិគ្រប់គ្រងគ្រោះមហន្តរាយ គ្រោងនឹងរៀបចំបំពាក់ឧបករណ៍ការពាររន្ទះនៅតាមតំបន់ប្រឈមមួយចំនួនដែលតែងតែកើតមាននូវបាតុភូតរន្ទះញឹកញាប់ ដើម្បីទប់ស្កាត់កុំឲ្យមនុស្សសត្វរងរបួសស្លាប់ជាបន្តទៀត ពិសេសបំពាក់នៅខេត្តចំនួន ៣ មុនគេ ដែលមានករណីរងគ្រោះច្រើនជាងគេរួមមាន ខេត្តសៀមរាប ពោធិ៍សាត់ និងខេត្តបាត់ដំបង។ ប៉ុន្តែមុននឹងឈានទៅបំពាក់ឧបករណ៍ការពាររន្ទះនេះ គណៈកម្មការជាតិគ្រោះមហន្តរាយ ត្រូវរៀបចំផែនការឲ្យបានច្បាស់លាស់ ពិសេសស្វែងរកថវិកាពីដៃគូ ក៏ដូចជាស្នើសុំថវិកាពីរាជរដ្ឋាភិបាលក្នុងការទិញឧបករណ៍ទាំងនោះ។ លោកបានបន្ថែមទៀតថា មុននឹងបំពាក់ឧបករណ៍ការពាររន្ទះបាញ់នេះ ក្រុមការងារគណៈកម្មការជាតិគ្រោះមហន្តរាយ នឹងចុះទៅសិក្សានៅខេត្តប្រឈមខ្ពស់ទាំងនោះជាមុនសិន ដើម្បីពិនិត្យមើល និងវាយតម្លៃពីតម្រូវការជាក់ស្ដែង ដើម្បីធ្វើរបាយការណ៍ជូនថ្នាក់ដឹកនាំសម្រាប់អនុម័តបន្ត៕ សម្រួលដោយ ទៀង បុណ្ណរី
