កុំចេះតែហ៊ាន..! ពេលនេះ អភិបាលខេត្តបន្ទាយមានជ័យចុះរុះរើបង្គោលរបងថ្ម ដែលក្រុមហ៊ុនកូណៃសាងសង់បំពានច្បាប់
បន្ទាយមានជ័យ៖ បន្ទាប់ពីមានសេចក្តីរាយការណ៍ពីប្រជាពលរដ្ឋរស់នៅតំបន់ភ្នំកងវ៉ា ថា ក្រុមហ៊ុនកូណៃ បានប្រើកម្មកររបស់ខ្លួនយកដុំថ្មធំៗបិទផ្លូវ មិនឱ្យប្រជាពលរដ្ឋដឹកកសិផលឆ្លងកាត់ និងបានយកបន្លាលួសធ្វើរបងបិទផ្លូវហ៊ុមព័ទ្ធភ្នំ យកធ្វើជាកម្មសិទ្ធិរបស់ខ្លួន នៅថ្ងៃទី២៣ ខែធ្នូ ឆ្នាំ២០២២ អភិបាលខេត្តបន្ទាយមានជ័យ បានដឹកនាំមន្ត្រីចម្រុះ ចុះរុះរើរបងបង្គោលរបងស៊ីម៉ងត៍ដាក់លួសបន្លាចេញ…។ប្រតិបត្តិការនេះ ដឹកនាំដោយ ឯកឧត្តម អ៊ំ រាត្រី អភិបាលខេត្តបន្ទាយមានជ័យ លោក ហ៊ឹល រ៉ាយ៉ា អភិបាលរងខេត្ត និងកម្លាំងចម្រុះ។ បានចុះទៅដកបង្គោលរបងស៊ីម៉ង់ត៍ និងរុះរើលួសបន្លាចេញ ក្រោយពីបុគ្គលដែលធ្វើរបងរំលោភយកចំណីភ្នំ រឺជើងភ្នំពង្រ ខាងកើតធ្វើជាកម្មសិទ្ធិ ហើយបានដាំកូនឈើមានប្រយោជន៍ជាច្រើនហិកតា និងក្រោយពីំានការចុះផ្សាយពីសារព័ត៌មាន ធី អិន អឹម រួចមកនោះ។ មុនពេលដែលឯកឧត្តម អ៊ំ រាត្រី ដឹកនាំមន្ត្រីចម្រុះចុះរុះរើ គឺដោយសារតែក្រុមហ៊ុនកូណៃ បានឱ្យបុគ្គលិករបស់ខ្លួនយកគ្រឿងចក្រ កាយយកដុំថ្មធំៗបិទផ្លូវ និងធ្វើរបងខ័ណ្ឌផ្តាច់ផ្លូវជ្រលងភ្នំជាច្រើនខ្សែ និងបានធ្វើរបងតាមជើងភ្នំហ៊ុំព័ទ្ធជួរភ្នំកងវ៉ា លើផ្ទៃដីរាប់រយហិកតាដូចជាកម្មសិទ្ធិរបស់ខ្លួន ស្ថិតនៅចំណុចជួរភ្នំកងវ៉ា ក្នុងភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដើម្បីដាំដំណាំ ចញ្ចឹមសត្វ ក៏ដូចជាកំពុងរៀបចំធ្វើអាជីវកម្មទេសចរណ៍នាពេលខាងមុខផងដែរ។ ឯកឧត្តមអភិបាលខេត្តបន្ទាយមានជ័យ បានអញ្ជើញចុះដល់កន្លែងកើតហេតុ និងបានរកឃើញមានអ្នកធ្វើរបងព័ទ្ធជើងភ្នំពង្រយកធ្វើកម្មសិទ្ធិ ដែលមានដាំកូនឈើមានប្រយោជន៍ និងសាងសង់អគារ២ទៅ៣ល្វែងក្បែរជើងភ្នំ និងធ្វើរបងឡោមព័ទ្ធជើងភ្នំពង្រយកធ្វើជាកម្មសិទ្ធិមានដីរាប់សិបហិកតា ទើបលោកបញ្ជាឱ្យរុះរើងឱ្យអស់តែម្ដង។ ប្រជាពលរដ្ឋនៅមូលដ្ឋានខាងលើ បានសម្តែងការកោតសសើរចំពោះ ឯកឧត្តមអភិបាលខេត្ត ដែលបានដឹកនាំមន្ត្រីចម្រុះ ចុះរុះរើបង្គោលរបង ដែលបុគ្គលថ្លើមធំហ៊ានធ្វើរបងឡោមព័ទ្ធយកភ្នំពង្រធ្វើជាកម្មសិទ្ធិ ដោយពលរដ្ឋស្នើឱ្យឯកឧត្តម អ៊ំ រាត្រី ចាត់វិធានការតច្បាប់ ទៅលើអ្នកដែលបានឡោមព័ន្ធយកភ្នំធ្វើជាកម្មសិទ្ធិនោះមកផ្តន្ទាទោសតាមច្បាប់ផងដែរ…៕ សម្រួលដោយ ទៀង បុណ្ណរី
