ក្រសួងអប់រំ នឹងប្រកាសលទ្ធលប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី២២ និងថ្ងៃទី២៣ ខែធ្នូខាងមុខ
ដោយសារការបូកពិន្ទុមានភាពលឿនឆាប់រហ័សនោះ ក្រសួងអប់រំ យុវជន និងកីឡា នឹង ប្រកាសលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) មុនការគ្រោងទុកដោយប្រកាសនៅថ្ងៃទី២២ ខែធ្នូ សម្រាប់រាជធានីភ្នំពេញ និងខេត្ដកណ្ដាល ហើយថ្ងៃទី២៣ ខែធ្នូ ឆ្នាំ២០២២ នៅតាមបណ្តាខេត្តផ្សេងៗទៀត។ នេះបើយោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា។ ក្នុងសេចក្ដីប្រកាសបានឱ្យដឹងថា ក្រសួងនឹងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង០៥ ខែធ្នូ ឆ្នាំ២០២២ នៅរាជធានីភ្នំពេញ និងខេត្តកណ្តាល នារសៀលថ្ងៃទី២២ ខែធ្នូ ឆ្នាំ២០២២ ចាប់ពីម៉ោង ១៥៖០០ នាទី និងនៅខេត្តដទៃទៀត នាព្រឹក ថ្ងៃទី២៣ ខែធ្នូ ឆ្នាំ២០២២។ ជាមួយគ្នានេះដែរ ក្រសួងអប់រំ ក៏បានជម្រាបជូនដល់លោក លោកស្រីប្រធាន ចាត់តាំងតំណាងដោយភ្ជាប់មកជាមួយនូវលិខិតឧទ្ទេសនាម ដែលប្រើប្រាស់ថវិកាអង្គភាពមន្ទីរ ឱ្យមកទទួលយកបញ្ជី ប្រកាសលទ្ធផលប្រឡងតាមមណ្ឌលសំណេរក្នុងរាជធានី ខេត្ត នៅបន្ទប់បូកសរុបរបាយការណ៍ អគាររដ្ឋបាល ចៅពញាហុក ជាន់ទី៥ ដើម្បីយក ទៅបិទផ្សាយនៅតាមមណ្ឌលសំណេរនីមួយៗ តាមកាលបរិច្ឆេទ និងពេលវេលាកំណត់ខាងលើ។ ចំពោះការបើកស្រោមបញ្ជីប្រកាសលទ្ធផលប្រឡង ត្រូវធ្វើតាមមណ្ឌលសំណេររៀងៗខ្លួន ដោយមានការចូលរួមពីនាយក នាយិកាគ្រឹះស្ថានសិក្សាដែលជាមណ្ឌលប្រឡង តំណាង ការិយាល័យអប់រំ យុវជន និងកីឡានៃរដ្ឋបាលក្រុង ស្រុក ខណ្ឌ ដែលមាន មណ្ឌលប្រឡង និងតំណាងអាជ្ញាធរដែនដីផងដែរ។ សូមជម្រាបជូនថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ឆ្នាំ២០២២ បានប្រព្រឹត្តទៅរយៈពេលពីរថ្ងៃ ពីថ្ងៃទី០៥-០៦ ខែធ្នូ ឆ្នាំ២០២២ ដែលមានបេក្ខជនចុះឈ្មោះប្រឡង ចំនួន ១២៨ ១៣៥ នាក់ ស្រី ៦៨ ៧៧១ នាក់ និងមានមណ្ឌលប្រឡង ២២១ ត្រូវជា ៥ ១៧៤ បន្ទប់៕ សម្រួលដោយ ទៀង បុណ្ណរី
