អភិបាលខេត្តកណ្តាល ចូលរួមក្នុងពិធីបិទការបោះជំរំយុវជនបីល្អ(កូនល្អ សិស្សល្អ មិត្តល្អ) ថ្នាក់ខេត្ត ឆ្នាំ២០២២
ការបោះជំរំយុវជនបីល្អ (កូនល្អ សិស្សល្អ មិត្តល្អ) ថ្នាក់ខេត្ត ឆ្នាំ២០២២ ក្រោមប្រធានបទ «ស្នាដៃយុវជនគាំទ្រគន្លឹះសហគមន៍សាលារៀន» គឺជាផ្នែកអប់រំដ៏មានសារៈបំផុត ដែលបានបង្កើតឱកាសប្រចាំឆ្នាំសម្រាប់យុវជនមកពីគ្រប់មជ្ឈដ្ឋានក្នុងទូទាំងខេត្ត មកជួបជុំគ្នាទទួលការបណ្ដុះបណ្ដាល សិក្សាស្រាវជ្រាវ ធ្វើការពិភាក្សា ផ្លាស់ប្ដូរបទពិសោធន៍ និងការបូកសរុបនូវវឌ្ឍនភាពការងារ របស់យុវជនតាមសាលារៀន ដែលបានអនុវត្តន៍យ៉ាងជោគជ័យ ប្រកបដោយការទទួលខុសត្រូវខ្ពស់ ដោយមានការចូលរួមពី ឯកឧត្តម គង់ សោភ័ណ្ឌ អភិបាលខេត្តកណ្ដាល នៅរាត្រីថ្ងៃអាទិត្យ ថ្ងៃទី១៨ ខែធ្នូ ឆ្នាំ២០២២ នៅមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្តាល ។ ឯកឧត្តម គង់ សោភ័ណ្ឌ អភិបាលខេត្តកណ្ដាល បានមានប្រសាសន៍ក្នុងពិធីបិទការបោះជំរំយុវជនបីល្អ (កូនល្អ សិស្សល្អ មិត្តល្អ) ថ្នាក់ខេត្ត ឆ្នាំ២០២២ថា ក្មួយៗសិស្សានុសិស្ស គឺពិតជាមានភ័ព្វសំណាងខ្លាំងណាស់ ដែលបានរស់នៅក្រោមម្លប់នៃសន្តិភាព ក្រោមការដឹកនាំដ៏ឈ្លាសវៃរបស់ ប្រមុខរាជរដ្ឋាភិបាល គឺសម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ បើប្រទេសជាតិគ្មានសន្តិភាពទេ គឺយើងមិនអាចមានឱកាសសិក្សារៀនសូត្រ និងអាចបោះជំរំជួបជុំគ្នាដូចពេលនេះបានទេ។សន្តិភាពគឺមូលដ្ឋានគ្រឹះនៃការអភិឌ្ឍលើគ្រប់វិស័យ ។ ដូច្នេះយើងទាំងអស់គ្នា ដែលជាសិស្សានុសិស្ស និងយុវជនដែលជាទំពាំងស្នងឫស្សី ជាសសរទ្រូងនៃប្រទេសជាតិ ត្រូវរួមគ្នាបន្តរក្សាបាននូវសុខសន្តិភាពជាដរាប ជាមួយរាជរដ្ឋាភិបាល និង ត្រូវខិតខំរៀនសូត្រ ឱ្យក្លាយជាធនធានដែលមានសក្ដានុពលមិនចេះរីងស្ងួត សម្រាប់អភិវឌ្ឍន៍ប្រទេសជាតិ។ ឯកឧត្តម អភិបាលខេត្ត បានជំរុញដល់មន្ទីរអប់រំយុវជន និងកីឡា ស្ថាប័នពាក់ព័ន្ធ ត្រូវបន្តលើកកម្ពស់ការអភិវឌ្ឍយុវជននៅតាមសាលារៀន តាមរយៈការរៀបចំពង្រឹង និងពង្រីករចនាសម្ព័ន្ធយុវជន និងកុមារជាប្រព័ន្ធក្រុមការងារដ៏មានសក្ដានុពល ក្នុងការសិក្សាអប់រំទាំងជំនាញទន់ និងជំនាញវិជ្ជាជីវៈ ភាពជាអ្នកដឹកនាំវ័យក្មេង សហគ្រិនភាព និងធុរកិច្ច ជាប្រយោ ជន៍សម្រាប់ការអភិវឌ្ឍសាលារៀន និងសហគមន៍។ ត្រូវរៀបចំឱ្យមានការជួបជុំយុវជនប្រកួតប្រជែងស្នាដៃវិទ្យសាស្ត្រ ការដេញដោលមតិ ការបោះជំរំ និងទស្សនកិច្ចសិក្សា ផ្លាស់ប្ដូរបទពិសោធន៍ក្នុងក្រុង ស្រុក ក្នុងខេត្ត និងក្រៅខេត្ត ដើម្បីឱ្យយុវជនយើងមានឱកាសទទួលបានបទពិសោធន៍ និងចំណេះដឹងថ្មីៗឱ្យបានទូលំទូលាយបន្ថែមទៀត ។ សូមជម្រាបថា ការបោះជំរំយុវជនបីល្អថ្នាក់ខេត្ត ឆ្នាំ២០២២ មានរយៈពេល ៣ថ្ងៃ ដែលបញ្ចប់នៅថ្ងៃទី១៨ ខែធ្នូ ឆ្នាំ២០២២ ដោយមានយុវជន តំណាងយុវជនមានស្នាដៃល្អប្រចាំឆ្នាំ២០២២ ចូលរួមបោះជំរំ នៅក្នុងបរិវេណមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្តាល សរុបចំនួន ១៦២នាក់ ស្រី ៨៥នាក់ ៕ សម្រួលដោយ ទៀង បុណ្ណរី
