សម្តេចកិត្តិព្រឹទ្ធបណ្ឌិតសម្តែងមរណទុក្ខយ៉ាងក្រៀមក្រំជាមួយគ្រួសារលោក គឹម ឃីស៊ុន ដែលទទួលមរណភាពដោយសារជំងឺកូវីដ១៩

TNM(ភ្នំពេញ) ៖ ក្នុងសារលិខិតរំលែកមរណទុក្ខនេះ សម្តេចកិត្តិព្រឹទ្ធបណ្ឌិត បានចាត់ទុកមរណភាពរបស់លោក គឹម ឃីស៊ុន គឺជាការបាត់បង់ស្វាមី និងឪពុក ដ៏ល្អ និងជាទីគោរពស្រលាញ់។ សម្តេចកិត្តិព្រឹទ្ធបណ្ឌិត បានបួងសួងសូមឱ្យវិញ្ញាណក្ខន្ធលោក គឹម ឃីស៊ុន បានទៅកាន់សុគតិភព។ ជាមួយនឹងការរំលែកទុក្ខនេះ សម្តេចកិត្តិព្រឹទ្ធិបណ្ឌិត បានចូលបច្ច័យបុណ្យសពចំនួន ១០លានរៀល និងទេយ្យទានមួយចំនួនទៀតផងដែរ។

ដោយសារតែកម្ពុជាកំពុងរងនូវការរាតត្បាតខ្លាំងពីជំងឺកូវីដ១៩នោះ នៅក្នុងសាររំលែកមរណទុក្ខនេះ សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា ក៏បានអំពាវនាវដល់បងប្អូនប្រជាពលរដ្ឋទាំងអស់ចូលរួមប្រយុទ្ធប្រឆាំង និងទប់ស្កាត់ការឆ្លងដោយអនុវត្តតាមវិធានសុខាភិបាល និងគោរពតាមការណែនាំរបស់រាជរដ្ឋាភិបាល និងអាជ្ញាធរ។ ជាពិសេសរួមគ្នាអនុវត្តវិធាន «៣ការពារ និង៣កុំ»។ ៣ការពារ៖ ពាក់ម៉ាស់ លាងដៃនឹងអាល់កុល ជែល សាប៊ូ រក្សាគម្លាតសុវត្ថិភាព គម្លាតបុគ្គលចាប់ពី១ម៉ែត្រកន្លះ, ៣កុំ៖ កុំបដិសណ្ឋារកិច្ចដោយចាប់ដៃ ឬឱប កុំជួបជុំក្នុងបន្ទប់បិទជិត កុំជួបជុំ និងកន្លែងមានមនុស្សកុះករ៕