ទឹកស្ទឹងមង្គលបូរី បានហក់ឡើងខ្លាំង ក្នុងពេលមានភ្លៀងធ្លាក់ជាប់ៗគ្នា
ខេត្តបន្ទាយមានជ័យ ៖ អាជ្ញាធរស្រុកមង្គលបូរី បានចេញសេចក្តីជូនដំណឹងដល់ប្រជាពលរដ្ឋឱ្យដឹងពីស្ថានភាពទឹកស្ទឹងមង្គលបូរី បានហក់ឡើងខ្លាំង ក្នុងពេលមានភ្លៀងធ្លាក់ជាប់ៗគ្នា និងទឹកហូរនៅផ្នែកខាងលើ ក្នុងស្រុកបវេល និងស្រុកម៉ាឡៃ គិតត្រឹមថ្ងៃទី០២ តុលា ឆ្នាំ២០២២ ។
ដោយយោងតាមសេចក្តីជូនដំណឹងរបស់រដ្ឋបាលស្រុកមង្គលបូរី បានជម្រាបបងប្អូនក្នុងស្រុកមង្គលបូរីថា ដោយពិនិត្យឃើញស្ថានភាពភ្លៀងនៅបន្តធ្លាក់ជាបៗគ្នាប៉ុន្មានថ្ងៃចុងក្រោយនេះ និងស្ថានភាពទឹកហូរធ្លាក់ពីផ្នែកខាងលើ តាមបណ្តោយដងស្ទឹងនៃស្រុកបវេល ខេត្តបាត់ដំបង និងហូរធ្លាក់ពីស្រុកម៉ាឡៃផង ធ្វើឱ្យកម្រិតទឹកស្ទឹងមង្គលបូរី មានការហក់ឡើងខ្លាំង និងអាចបង្កជាផលប៉ះពាល់ដល់អាយុជីវិតមនុស្ស សត្វ ផ្ទះ សម្បែង និងផលដំណាំកសិកម្ម ។
លោក រ័ត្ន ដាស៊ីណង់ អភិបាលស្រុកមង្គលបូរី បានអំពាវនាវដល់ប្រជាពលរដ្ឋរស់នៅតាមដងស្ទឹងមង្គលបូរី ជាពិសេសនៅឃុំសឿ ចំណោម រហាត់ទឹក បត់ត្រង់ និងនិងបណ្តាឃុំមួយចំនួនទៀត ត្រូវមានការប្រុងប្រយ័ត្នចំពោះកូនចៅ និងសម្ភារ នៅពេលទឹកជំនន់ហក់ឡើងខ្លាំង សូមទំនាក់ទំនងមកគណៈកម្មាធិការគ្រប់គ្រងគ្រោះមហន្តរាយស្រុក ដែលមានលេខទូរស័ព្ទ០១២ ៥០០ ០៨៣/០៧៧ ២៣៤ ៨៤៨/០១៥ ៤៨១ ០៥៨ ដើម្បីជួយសង្គ្រោះនិងជម្លៀសរកទីទួលសុវត្ថិភាពដែលមានកម្លាំងត្រៀមបម្រុងទុកជាស្រេច សម្រាប់ជួយអន្តរាគមន៍ ។
លោកបានបញ្ជាក់ថា រហូតដល់ថ្ងៃទី០២ ខែតុលា ឆ្នាំ២០២២ នៅស្រុកមង្គលបូរី មាន៨ឃុំ ស្មើ៤៨ភូមិ ដែលរងផលប៉ះពាល់ដោយទឹកជំនន់ជន់លិច មានចំនួន៨៩៣គ្រួសារ ស្មើ៣.៦៤៤នាក់ស្រី១.៨៨០នាក់ ស្លា.ប់ដោយលង់ទឹក៤នាក់ ជម្លៀស៨៦គ្រួសារ ស្មើ៣៣៥នាក់ ស្រី១៧២នាក់ កុមារ៣៣នាក់ ទឹកលិចស្រូវដែលជិតប្រមូលផល២.៩៨៧ហិកតា លិចដំឡូងមី៤ហិកតា លិចដំណាំរួមផ្សំ៧ហិកតា សត្វពាហនៈ២៧ក្បាល សាលារៀល៧កន្លែង វត្ត១កន្លែង ទឹកហូរកាត់ផ្លូវ៨៥ខ្សែប្រវែង៥២.៩៩៤ម៉ែត្រ ៕
