ពិធីសម្ពោធដាក់ឲ្យដំណើរការការិយាល័យច្រកចេញចូលតែមួយនិងការរិយាល័យប្រជាពលរដ្ឋរបស់សាលាស្រុកកំពង់រោទិ៍
ឯកឧត្តម ម៉ែន វិបុល អភិបាល គណៈអភិបាលខេត្តស្វាយរៀង នាព្រឹកថ្ងៃព្រហសត្តិ៍ ទី០១ខែកញ្ញា ឆ្នាំ២០២២ នេះ បានអញ្ជើញជាអធិបតី នៅក្នុងពិធីសម្ពោធដាក់ឲ្យដំណើរការ ការិយាល័យច្រកចេញចូលតែមួយ និងការិយាល័យប្រជាពលរដ្ឋ ឋិតនៅបរិវេណ្ឌសាលាស្រុកកំពង់រោទិ៍ ។ ពិធីនេះ មានការអញ្ជើញចូលរួមពីលោក សុខ រស់ អភិបាលរងខេត្ត លោកប្រធានមន្ទីរ អង្គភាពពាក់ព័ន្ធនានាក្នុងខេត្ត តំណាងកងកម្លាំងប្រដាប់អាវុធ ទាំងបីប្រភេទ លោកនាយកទីចាត់ការហិរញ្ញវត្ថុសាលាខេត្ត ក្រុមប្រឹក្សាស្រុក លោក សុច ពិសី គណ:អអភិបាលស្រុក មន្ត្រីរាជការសាលាស្រុក និងការិយាល័យនានា ជុំវិញស្រុក ប្រធានមន្ត្រី មន្រ្តីការិយាល័យច្រកចេញចូលតែមួយ មេឃុំ ក្រុមប្រឹក្សាឃុំ ស្មៀនឃុំ និងនាយប៉ុស្តិ៍នគរបាលរដ្ឋបាល ទាំង១១ឃុំ ព្រមទាំងបងប្អូនប្រជាពលរដ្ឋ ជាច្រេីនរូប។ លោក សុច ពិសី អភិបាលស្រុកកំពង់រោទិ៍ នៅក្នុងឱកាសនោះ បានលើកឡើងពីស្ថានភាព ភូមិសាស្ត្ររបស់ស្រុក និងវឌ្ឍនភាពការងារ នៃការរៀបចំការិយាល័យច្រកចេញចូល តែមួយ និងការិយាល័យបប្រជាពលរដ្ឋស្រុកកំពង់រោទិ៍ ដែលបានសម្ពោធដាក់ឲ្យដំណើរការ នៅថ្ងៃនេះ។ នាឱកាសនោះ លោក ម៉ែន វិបុល អភិបាលខេត្តស្វាយរៀង បានផ្ដាំផ្ញើដល់មន្ត្រី និងបុគ្គលិកបម្រើការងារ នៅការិយាល័យច្រកចេញចូលតែមួយ ត្រូវមានអាកប្បកិរិយា ទន់ភ្លន់ សាមញ្ញ រួសរាយ រាក់ទាក់ ត្រូវប្រកាន់ភ្ជាប់ នូវគោលការណ៍ក្រមសីលធម៌វិជ្ជាជីវៈ សាកសមជាអ្នកផ្ដល់សេវា ជូនប្រជាពលរដ្ឋ ហើយរដ្ឋបាលស្រុក ត្រូវមានយន្តការ ត្រួតពិនិត្យ តាមដានឲ្យបានជាប់ជាប្រចាំ និងគាំទ្រដល់ដំណើរការ ការិយាល័យច្រក ចេញចូលតែមួយ និងការិយាល័យបប្រជាពលរដ្ឋ ដើម្បីធានាថា ការផ្តល់សេវារដ្ឋបាលទាំងនេះ ប្រកបដោយតម្លាភាព និងគណនេយ្យភាព ស្របតាមគោលការណ៍បែបបទ និងនីតិវិធីដែលបានកំណត់ ។ ទន្ទឹមនេះ សម្រាប់មន្ទីរ ជំនាញពាក់ព័ន្ធ សូមបន្តខិខិតខំជំរុញនិងសម្របសម្រួល ដើម្បីពន្លឿនការផ្ទេរសេវានានា ដែលនៅសេសសល់ មកឲ្យការិយាល័យច្រកចេញចូលតែមួយ នៅសាលាស្រុក រួមទាំងការគាំទ្រ ខាងបច្ចេកទេស និងការកសាងសមត្ថភាព ដល់ការផ្តល់សេវាទាំងនេះ ឲ្យកាន់តែមានប្រសិទ្ធភាព ក្នុងនោះ មន្ទីរពាក់ព័ន្ធទាំងអស់ ត្រូវចូលរួមជួយផ្សព្វផ្សាយ និងជំរុញឲ្យប្រជាពលរដ្ឋ ដែលមានមូលដ្ឋាននៅក្នុងស្រុកកំពងរោទិ៍ មកទទួលសេវា តាមរយៈការិយាល័យច្រកចេញចូលតែមួយស្រុក ដោយមិនត្រូវ ទទួលពាក្យស្នើសុំសេវា នៅមន្ទីរបន្តទៀតនោះទេ បន្ទាប់ពីការិយាល័យនេះ បានបើកឲ្យដំណើរការជាផ្លូវការ នាពេលនេះ ។ លោកបានបន្តថាៈ ដោយបច្ចុប្បន្ន ករណីជំងឺកូវីដ-១៩ នៅតែជាបញ្ហាប្រឈមនៅឡើយ ហើយការិយាល័យច្រកចេញតែមួយរបស់យើង ជាកន្លែងផ្ដល់សេវាផ្ទាល់ ជូនប្រជាពលរដ្ឋ ដូច្នេះ រដ្ឋបាលស្រុក ត្រូវចាត់ចែងរៀបចំ ឲ្យមានជែល ឬអាល់កុល និងម៉ាស់ សម្រាប់មន្ត្រីរាជការបម្រើការងារ ក្នុងការិយាល័យច្រកចេញចូលតែមួយ ប្រើប្រាស់ និងណែនាំឲ្យប្រជាពលរដ្ឋ ពាក់ម៉ាស និងលាងដៃ ពេលចេញចូលទទួលសេវា នៅក្នុងការិយាល័យច្រក ។ លោកអភិបាលខេត្ត ក៏បានស្នើដល់រដ្ឋបាលស្រុក និងឃុំ ត្រូវបន្តយកចិត្តទុកដាក់ បន្ថែមទៀត ក្នុងកិច្ចការដឹកនាំការអនុវត្តវិធានការបង្ការ ទប់ស្កាត់ការរីករាលដាល នៃជំងឺកូវីដ-១៩ និងជំរុញដឹកនាំការងារចាក់វវ៉ាក់សាំងបន្ថែមទៀត ស្របតាមការណែនាំ របស់ប្រមុខរាជរដ្ឋាភិបាល និងក្រសួងសុខាភិបាល និងក៏សូមអំពាវនាវ ដល់បងប្អូនប្រជាពលរដ្ឋ បន្តមានការប្រុងប្រយ័ត្ន កុំឲ្យមានការធ្វេសប្រហែស ដោយប្រកាន់ខ្ជាប់ នូវវិធានការ ៣ការពារ ៣កុំ និងអញ្ជើញទៅ ទទួលការចាក់វ៉ាក់សាំង ឲ្យបានគ្រប់ដូសទាំងអស់គ្នា៕ដោយ៖សាមឿនTNM សម្រួលដោយ ទៀង បុណ្ណរី
