គណៈកម្មការទី២នៃព្រឹទ្ធសភា អញ្ជើញចុះសិក្សាឈ្វេងយល់ អំពីការពង្រឹងកិច្ចការរដ្ឋបាលឃុំ-សង្កាត់ ក្រោយការបោះឆ្នោត ធានាបានសុវត្ថិភាពមូលដា្ឋន និងសណ្តាប់ធ្នាប់សាធារណៈ

 នៅថ្ងៃទី២៨ ខែកក្កដា ឆ្នាំ២០២២ គណៈកម្មការទី២នៃព្រឹទ្ធសភា អញ្ជើញចុះសិក្សាឈ្វេងយល់ អំពីការពង្រឹងកិច្ចការរដ្ឋបាលឃុំ-សង្កាត់ ក្រោយការបោះឆ្នោត សំដៅអភិវឌ្ឍន៍មូលដា្ឋន ធានាបានសុវត្ថិភាព និងសណ្តាប់ធ្នាប់សាធារណៈនៅខេត្តព្រៃវែងដេលពិធីនេះក្រោមអធិបតិភាពលោក សួន សុម៉ាលីន អភិបាលរងខេត្ត តំណាងឯកឧត្តម ជា សុមេធី អភិបាលខេត្ត និងឯកឧត្តម ជា ជេដ្ឋ ប្រធានគណៈកម្មការទី២ នៃព្រឹទ្ធសភា ព្រមទាំងមានការអញ្ជើញចូលរួមពីមន្ទីរអង្គភាពពាក់ព័ន្ធជាច្រើនរូប។ ថ្លែងនៅក្នុងឱកាសនោះលោក សួន សុម៉ាលីន អភិបាលរងខេត្ត តំណាងឯកឧត្តម ជា សុមេធី អភិបាលខេត្ត បានរាយការណ៍ថា៖ ក្នុងការលើកកម្ពស់ ការអភិវឌ្ឍន៍មូលដ្ឋាន ស្របតាមច្បាប់ ស្តីពីការគ្រប់គ្រង រដ្ឋបាលរាជធានី ខេត្ត ក្រុង ស្រុក ខណ្ឌ និងគោលនយោបាយកំណែទម្រងវិមជ្ឈការ រដ្ឋបាលខេត្តបានយកចិត្តទុកដាក់ អនុវត្តតួនាទី ភារៈកិច្ច ស្របតាមច្បាប់ និងវិធានការនានា សំដៅឲ្យការអនុវត្តន៍របស់រដ្ឋបាលខេត្ត ធានាបាននូវប្រសិទ្ធភាពការងារ និងធ្វើការឆ្លើយតបគោលនយោបាយរបស់រាជរដ្ឋាភិបាល និងតម្រូវការនានារបស់ប្រជាពលរដ្ឋនៅមូលដ្ឋានប្រកបដោយ ភាពឆ្លើយតប ។ ក្រោយពីបានផ្ទេរ និងការធ្វើសមាហរណកម្មក្នុងចនាសម្ព័ន្ធថ្មីនៃរដ្ឋបាលបាលក្រុង ស្រុក ទូទាំងខេត្ត បានធ្វើ ឲ្យរដ្ឋបាលថ្នាក់ក្រុង ស្រុក ជារដ្ឋបាលមួយប្រកបដោយថាមពល ទាំងបុគ្គលិក ទាំងធនធាន ដើម្បីប្រមូលផ្ដុំការដឹកនាំ គ្រប់វិស័យក្នុងដែនដីរបស់ខ្លួន ប្រកបដោយគុណភាព ប្រសិទ្ធភាព និងភាពឆ្លើយតបខ្ពស់ជាងមុន។ ក្នុងស្មារតីរួមនៃ កំណែទម្រង់ ដ៏មានសារៈសំខាន់នេះ និង ក្នុងនាមជាអង្គភាពរដ្ឋបាលថ្នាក់ក្រោមជាតិ រដ្ឋបាលខេត្តពង្រឹងការលើក កម្ពស់កិច្ចគាំទ្រដល់រដ្ឋបាលក្រុង ស្រុក និងឃុំ សង្កាត់ ដើម្បីឲ្យការអនុវត្ដន៍ទូននាទីភារកិច្ច របស់ថ្នាក់រដ្ឋបាលទាំងនោះ ប្រព្រឹត្តទៅស្របតាមច្បាប់ និងវិធានការទាំងឡាយជាធរមាន ពិសេសការលើកខ្ពស់ការអភិវឌ្ឍន៍មូលដ្ឋានកាន់តែ ប្រសើរថែមទៀត។ជាមួយនេះ ក្រោយពីការបោះឆ្នោយជ្រើសរើសក្រុមប្រឹក្សា ឃុំ សង្កាត់ អាណត្តិទី៥ កាលពីថ្ងៃទី០៥ ខែមិថុនា ឆ្នាំ២០២២ គិតមកទល់ពេយនេះ រដ្ឋបាលខេត្ត បានដំណើរការប្រកាសសុពលភាពសមាជិកក្រុមប្រឹក្សាឃុំ សង្កាត់ រួចរាល់ទាំង១១៦ឃុំ សង្កាត់ នៅទូទាំងខេត្តព្រៃវែង ដើម្បីចាប់់ផ្ដើមបំពេញករងារបន្ទាប់ពីការប្រជុំលើកដំបូង។ ក្រៅអំពីការខិតខំប្រឹងប្រែងកសាងហេដ្ឋារចនាសម្ព័ន្ធរូបវ័ន្តនានា ដើម្បីបម្រើដល់ការរស់នៅរបស់ប្រជាពលរដ្ឋ រដ្ឋបាលខេត្តបានយកចិត្ត ទុកដាក់អនុវត្តតាមវិធានគតិយុត្តនានាជាធរមាន និងតម្រូវការចាំបាច់របស់ប្រជាពលរដ្ឋនៅ មូលដ្ឋានប្រកបដោយគុណភាព គុណធម៌ និងភាពឆ្លើយតប។ មកដល់បច្ចុប្បន្ននេះ ប្រជាពលរដ្ឋស្ទើរគ្រប់គ្រួសារ សុទ្ធតែមានសៀវភៅគ្រួសារ សៀវភៅស្នាក់នៅ អត្តសញ្ញាណប័ណ្ណសញ្ញាតិខ្មែរ និងអត្រានុកូលដ្ឋាន។ ក្នុងគោលដៅ លើកកម្ពស់សេវាកាន់តែប្រសើរថែមទៀត រដ្ឋបាលខេត្តបានពង្រីកការផ្តល់សេវាស្របតាមគោលនយោបាយរបស់រាជ រដ្ឋាភិបាល ពាក់ព័ន្ធនឹងវិស័យនានា ទាំងនៅថ្នាក់ខេត្ត និងក្រុង ស្រុក ឃុំ សង្កាត់ ជូនប្រជាពលរដ្ឋ។ ក្នុងនោះដេរ ឯកឧត្តម ជា ជេដ្ឋ ប្រធានគណៈកម្មការទី២ នៃព្រឹទ្ធសភា បានមានប្រសាសន៍កោតសរសើរនិងវាយតម្លៃខ្ពស់ចំពោះការខិតខំប្រឹងប្រែងធ្វើការងារអស់កម្លាំងកាយចិត្តរបស់រដ្ឋបាលខេត្តអាជ្ញាធរមន្ទីរអង្គភាពពាក់ព័ន្ធទាំងអស់ក្នុងការបំពេញការងាររបស់ខ្លួនប្រកបដោយការទទួលខុសត្រូវខ្ពស់ ក្នុងការបម្រើនូវសេវាសាធារណៈជូនបងប្អូនប្រជាពលរដ្ឋនៅតាមមូលដ្ឋានបានយ៉ាងល្អប្រសើនាពេលកន្លងមក។ ហើយក្នុងនោះដែរឯកឧត្តម ក៏បានជំរុញនិងផ្ដល់កម្លាំងចិត្តដល់រដ្ឋបាលខេត្តអាជ្ញាធរពាក់ព័ន្ធ ធ្វើយ៉ាងណាត្រូវតែបម្រើសេវាសាធារណៈជូនបងប្អូនប្រជាពលរដ្ឋនៅតាមមូលដ្ឋានឲ្យកាន់តែប្រសើរឡើងថែមទៀត ស្របតាមគោលនយោបាយរបស់រាជរដ្ឋាភិបាលដែលបានដាក់ចេញក្នុងការបម្រើសេវាសាធារណៈជូនប្រជាពលរដ្ឋឱ្យកាន់តែប្រសើរឡើងមួយទ្វេដងថែមទៀតនោះ។ ឯកឧត្តម ក៏សូមណែនាំដល់មន្ទីរអង្គភាព ពាក់ព័ន្ធទាំងអស់ដែលបានលើកឡើងនូវចំណុចបញ្ហាប្រឈមនានានៅក្នុងអង្គប្រជំុនេះត្រូវខិតខំបំពេញបន្ថែមទៀតដើម្បីធ្វើយ៉ាងណាឱ្យការងារនេះសម្រេចបាននូវលទ្ធផលល្អនាពេលខាងមុខសម្រាប់បងប្អូនប្រជាពលរដ្ឋ នៅតាមមូលដ្ឋានរបស់ខ្លួន៕សម្រួលដោយ ទៀង បុណ្ណរី