កម្មវិធីសម្ព័ន្ធភាពប្រែប្រួលអាកាសធាតុកម្ពុជា ដំណាក់កាលទី៣ (CCCA3) បានរៀបចំសិក្ខាសាលាបណ្តុះបណ្តាលស្តីពីការប្រែប្រួលអាកាសធាតុដល់មន្រ្តីថ្នាក់ក្រោមជាតិ

ខេត្តកំពង់ធំ៖ នាយកដ្ឋានប្រែប្រួលអាកាសធាតុ នៃអគ្គនាយកដ្ឋានគោលនយោបាយនិងយុទ្ធសាស្រ្ត ក្រសួងបរិស្ថាន ក្រោមការគាំទ្រពីកម្មវិធីសម្ព័ន្ធភាពប្រែប្រួលអាកាសធាតុកម្ពុជា ដំណាក់កាលទី៣ (CCCA3) បានរៀបចំសិក្ខាសាលាបណ្តុះបណ្តាលស្តីពីការប្រែប្រួលអាកាសធាតុដល់មន្រ្តីថ្នាក់ក្រោមជាតិ ពីថ្ងៃទី២៩-៣០ ខែមិថុនា ឆ្នាំ២០២២ នៅសណ្ឋាគារកំពង់ធំរ៉ូយ៉ាល់ ខេត្តកំពង់ធំ។ សិក្ខាសាលានេះមានគោលបំណងពង្រឹងសមត្ថភាព និងការយល់ដឹងដល់សហគមន៍មូលដ្ឋាន អាជ្ញាធរ និងមន្រ្តីពាក់ព័ន្ធនៅថ្នាក់ក្រោមជាតិអំពីការប្រែប្រួលប្រួលអាកាសធាតុ និងការរៀបចំកសាងផែនការនិងយន្តការឆ្លើយតបឱ្យកាន់តែមានប្រសិទ្ធភាព។ សិក្ខាសាលានេះប្រព្រឹត្ដទៅក្រោមអធិបតីភាព ឯកឧត្តម ជា ចន្ទន៍ធូ អគ្គនាយករង នៃអគ្គនាយកដ្ឋានគោលនយោបាយនិងយុទ្ធសាស្រ្ត តំណាងរដ្ឋបាលខេត្តកំពង់ធំ តំណាងគណៈកម្មាធិការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ មន្រ្តីពាក់ព័ន្ធនិងសហគមន៍មូលដ្ឋានមកពីខេត្តកំពង់ធំ ព្រះវិហារ ឧត្តរមានជ័យ និងស្ទឹងត្រែងសរុបចំនួន ៧៥រូប។