ផ្លូវបេតុងប្រវែង ៦គីឡូម៉ែត្រ ស្ថិតនៅភ្នំកែបធំ នៃឧទ្យានជាតិកែប ប្រសិទ្ធិនាមថា «រុក្ខវិថីបុប្ជាប្រសិទ្ធ» ត្រូវសម្ពោធដាក់ឱ្យប្រើប្រាស់ជាផ្លូវការ

ខេត្តកែប៖ ផ្លូវបេតុងប្រវែង ៦គីឡូម៉ែត្រ ស្ថិតនៅភ្នំកែបធំ នៃឧទ្យានជាតិកែបប្រសិទ្ធិនាមថា «រុក្ខវិថីបុប្ជាប្រសិទ្ធ» ត្រូវបានសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី៤ ខែឧសភា ឆ្នាំ២០២២ ។

ក្រោមអធិបតីភាពឯកឧត្ដម សាយ សំអាល់ រដ្ឋមន្ត្រីក្រសួងបរិស្ថាន លោកស្រី ចម និម្មល រដ្ឋលេខាធិការក្រសួងពាណិជ្ជកម្ម, លោក សោម ពិសិដ្ឋ អភិបាលខេត្តកែប ព្រមទាំងរដ្ឋលេខាធិការ អនុរដ្ឋលេខាធិការ អគ្គនាយក អគ្គនាយិកា ក្រុមប្រឹក្សាខេត្ត លោក លោកស្រី អភិបាលរងខេត្ត តំណាងកងកម្លាំងប្រដាប់អាវុធទាំង៣ប្រភេទ មន្ទីរ អង្គភាពជុំវិញខេត្ត រដ្ឋបាល ក្រុង ស្រុក ប្រជាពលរដ្ឋ និងសិស្សានុសិស្សសរុប៤៤០នាក់។

ឯកឧត្ដម សាយ សំអាល់ បានថ្លែងថារុក្ខវិថីបុប្ជាប្រសិទ្ធ ដែលរដ្ឋមន្ត្រីក្រសួងបរិស្ថាន បានចាត់ទុកថាមិនត្រឹមតែជាមធ្យោបាយសម្រាប់ធ្វើដំណើរប៉ុណ្ណោះទេ តែផ្លូវនេះគឺជាការវិនិយោគទៅលើសេដ្ឋកិច្ចមូលដ្ឋាននិង ទាក់ទាញភ្ញៀវទេសចរមកលំហែកម្សាន្តបែបធម្មជាតិហើយ ស្រូបយកខ្យល់អាកាសបរិសុទ្ធ គយគន់រុក្ខជាតិពណ៍បៃតងជាច្រើននៅក្នុងព្រៃនៃឧទ្យានជាតិនេះ។ «រុក្ខវិថីប្រវែង ៦គីឡូម៉ែត្រនេះ ត្រូវបានស្តារ និងសាងសង់ឡើងដោយប្រើប្រាស់ថវិកាបានមកពីការលក់ឥណទានកាបូន និងទុកជាប្រយោជន៍សម្រាប់ការប្រើប្រាស់របស់ប្រជាពលរដ្ឋ។ អ្វីដែលសំខាន់ យើងចង់ប្រែក្លាយផ្លូវ និងឧទ្យានជាតិនេះទៅជាផ្នែកមួយនៃសេដ្ឋកិច្ចរបស់ខេត្តកែប ជាផ្នែកមួយដែលចូលរួមលើកស្ទួយជីវភាពរបស់ប្រជាពលរដ្ឋ មន្ត្រីរាជការ កងកម្លាំងប្រដាប់អាវុធនៅខេត្តកែប។ ថវិកាដែលបានមកពីការលក់ឥណទានកាបូន យើងបានយកមក វិនិយោគលើហេដ្ឋារចនាសម្ព័ន្ធសាធារណៈដែលជួយបងប្អូនប្រជាពលរដ្ឋ។ ការកសាងហេដ្ឋារចនាសម្ព័ន្ធនេះក៏ស្ថិតក្នុងគោលបំណងជំរុញការអភិវឌ្ឍវិស័យទេសចរណ៍នៅខេត្តកែប បង្កើតការងារ និងបង្កើនចំណូលជូនប្រជាពលរដ្ឋ។ អ្វីដែលក្រសួងបរិស្ថានធ្វើនៅទីនេះ មិនមែនជំរុញលើការការពារនិងអភិរក្ស ឧទ្យានជាតិនេះឱ្យមានសោភ័ណភាពស្អាតទេ តែដើម្បីទាក់ទាញភ្ញៀវទេសចរឱ្យមកទស្សនាខេត្តកែបឱ្យកាន់តែច្រើនបន្ថែមទៀត និងដើរកម្សាន្តនៅជុំវិញភ្នំកែបធំនេះ»។

ឯកឧត្ដរដ្ឋមន្ត្រីក្រសួងបរិស្ថាន បានគូសបញ្ជាក់ថា ទន្ទឹមនឹងការគ្រប់គ្រងអភិរក្សឱ្យបានល្អប្រសើរ ក្រសួងបរិស្ថានបានគិតគូរក្នុងការប្រែក្លាយតំបន់អភិរក្សធម្មជាតិមួយចំនួនដូចជាឧទ្យានជាតិ ដែនជម្រកសត្វព្រៃដែលមានសក្តានុពលទេសចរណ៍ មិនត្រឹមតែជាកន្លែងថែរក្សាអភិរក្សធនធានធម្មជាតិ សត្វព្រៃ និងជីវៈចម្រុះ តែក៏ជាកន្លែងទេសចរណ៍ធម្មជាតិសម្រាប់ប្រជាពលរដ្ឋ និងភ្ញៀវទេសចរណ៍ដើរកម្សាន្ត។ ការដើរទន្ទឹមគ្នានឹងការអភិវឌ្ឍន៍សេដ្ឋកិច្ចមូលដ្ឋានរបស់ខេត្តនីមួយៗ។ ដើម្បីសម្រេចគោលបំណងនេះ យើងត្រូវការថវិកាដើម្បីអនុវត្ត ហើយថវិកាដែលយកមកអនុវត្តគឺបានមកពីថវិកាលក់ឥណទានកាបូនដែលកម្ពុជាទទួលបានជោគជ័យលក់ក្នុងទីផ្សារឥណទានកាបូនស្ម័គ្រចិត្តអន្តរជាតិ។

ឯឧត្ដម សោម ពិសិដ្ឋ អភិបាលខេត្តកែប បានថ្លែងថា រដ្ឋបាលខេត្ត បានខិតខំយកចិត្តទុកដាក់ចំពោះការគាំពារបរិស្ថាន ការអភិរក្សជីវៈចម្រុះប្រកបដោយចីរភាព ការកសាងហេដ្ឋារចនាសម្ព័ន្ធជារូបវន្តជាដើម ដូចថ្ងៃនេះ ខេត្តកែបបានជួសជុល ស្ថាបនាឡើងវិញ និងសម្ពោធឱ្យប្រើប្រាស់នៅផ្លូវបេតុងជុំវិញឧទ្យានជាតិកែប ដែលជាផ្លូវចាស់ ក្នុងសម័យសង្គមរាស្ត្រនិយម ហើយផ្លូវនេះត្រូវបានជួសជុលជាបន្តបន្ទាប់ លើកទី១ ឆ្នាំ១៩៩៨, លើកទី២ ឆ្នាំ២០០៤, លើកទី៣ ឆ្នាំ២០០៩-២០១០ ជួសជុលពង្រីកអោយធំ និងលើកទី៤ ជួសជុល ស្ថាបនា ចាក់បេតុង មានទទឹង ៣ម៉ែត្រ បណ្តោយ ៦,០០០ម៉ែត្រ ដោយប្រើប្រាស់ថវិការបស់ក្រសួងបរិស្ថាន ដោយចាប់ផ្តើមជួសជុល នៅថ្ងៃទី២៧ ខែមករា និងបញ្ចប់នៅថ្ងៃទី៣០ ខែមេសា ឆ្នាំ២០២២។

លោកបានបន្តថា ក្រៅពីការអភិវឌ្ឍន៍ហេដ្ឋារចនាសម្ព័ន្ធ មានផ្លូវកៅស៊ូ ផ្លូវបេតុង កំពង់ផែកោះទន្សាយ ផ្លូវគ្រួសក្រហម រដ្ឋបាលខេត្តកែប ក៏មានសមិទ្ធផលផ្សេងទៀតដែរ ក្នុងការថែរក្សាបរិស្ថាន មានដូចជា ទីលានចាក់សំរាម ទំហំ ១៣.៣៩ហិចតា អាងប្រព្រឹត្តិកម្មចម្រោះទឹកកខ្វក់ ឡដុតសំរាមតាមលក្ខណៈបច្ចេកទេសផងដែរ។

បន្ថែមពីនេះ ឯកឧត្ដមរដ្ឋមន្ត្រីក្រសួងបរិស្ថាន ក៏បានអំពាវនាវដល់មន្ទីរអង្គភាពពាក់ព័ន្ធ ប្រជាពលរដ្ឋត្រូវរួមគ្នាជួយថែរក្សាផ្លូវមួយខ្សែនេះឱ្យបានយូអង្វែង ព្រោះការកសាងសមិទ្ធផលនីមួយៗពិបាក ព្រមទាំងនឹងចំណាយពេលយូរណាស់ ទម្រាំលេចចេញជារូបរៀង សម្រាប់ជាប្រយោជន៍ដល់កូនចៅជំនាន់ក្រោយៗទៀត៕សម្រួលដោយ ទៀង បុណ្ណរី