ក្រសួងធនធានទឹក ៖ កម្ពុជាមិនទាន់មានបញ្ហាធ្ងន់ធ្ងរពីឥទ្ធិពលនៃកាំរស្មី UV នៅឡើយទេ
TNM(ភ្នំពេញ) ៖ ក្រសួងធន ធានទឹក និងឧតុនិយមបានចេញ នូវសេចក្តីជូនដំណឹងដោយ បានសន្និដ្ឋានថា ប្រទេសកម្ពុជា មិន ទាន់មានសភាព ធ្ងន់ធ្ងរពីឥទ្ធិពល នៃកាំរស្មីយូវី ( UV ) នៅឡើយទេ ហើយអាស៊ីតទឹកភ្លៀងក៏មិនទាន់ធ្ងន់ធ្ងរនោះដែរ។
ពាក់ព័ន្ធការលើកឡើងនៃកាំរស្មី UV នៅប្រទេសវៀតណាមភាគខាងត្បូងនោះកាលពីរសៀលថ្ងៃទី១៧ ខែកុម្ភៈ ឆ្នាំ២០២១ ស្ថានឯកអគ្គរាជទូត នៃព្រះរាជាណាចក្រកម្ពុជាប្រចាំវៀតណាម បានជូនដំណឹងដល់ និស្សិត សិក្ខាកាម យោធា នគរបាល និងប្រជាពលរដ្ឋកម្ពុជាទាំងអស់ ដែលកំពុងមានវត្តមានក្នុងប្រទេសវៀតណាម ពិសេសនៅទីក្រុងហូជីមិញ និងខេត្តភាគខាងត្បូងពីការកើនឡើងសន្ទស្សន៍កាំរស្មី វិទ្យុសកម្មយូវី ដែលអាចនឹងឡើងដល់កម្រិតហានិភ័យខ្ពស់គឺពី ១០ឡើងទៅ នៅទីក្រុងហូជីមិញ ទីក្រុងញ៉ាត្រាង ទីក្រុង Can Tho និងទីក្រុង Ca Mau។ នៅខេត្តThua Thien Hue និងទីក្រុងដាណាង សន្ទស្សន៍នេះ នឹងឡើងដល់កម្រិតហានិភ័យខ្ពស់គឺ៨។ កាំរស្មីវិទ្យុសកម្មយូវីខ្លាំង កើតមានភាគច្រើនមាននៅចន្លោះ ម៉ោង១១ ព្រឹក ដល់១រសៀល។
ឯកអគ្គរាជទូតកម្ពុជា សន្ទស្សន៍កាំរស្មីវិទ្យុសកម្មយូវី ពី៨ ទៅ១០ មានន័យថា ជាកំរិតកាំរស្មីយូវីខ្លាំង អាចឆ្លងកាត់ពពក វ៉ែនតា និងធ្វើឲ្យរលាក ក្នុងរយៈពេល២៥នាទី។ សន្ទស្សន៍ចាប់ពី១១ ឡើងទៅ ជាកាំរិតកាំរស្មីយូវីខ្លាំងណាស់ អាចបង្កឱ្យខូចខាតស្បែក និងភ្នែក ក្នុងរយៈពេល១៥ នាទី បើប៉ះពាល់ផ្ទាល់នឹងពន្លឺព្រះអាទិត្យ។
ស្ថានអគ្គរាជទូតក៏អំពាវនាវដល់និស្សិត សិក្ខាកាម និងប្រជាពលរដ្ឋកម្ពុជា កំពុងមានវត្តមាននៅ ប្រទេសវៀតណាម ពិសេសនៅតាមខេត្ត និងក្រុងដូចមានរាយឈ្មោះខាងលើ ត្រូវមានការប្រុងប្រយ័ត្ន ការពារ ដោយត្រូវស្លៀកសម្លៀកបំពាក់ការពារកំដៅ, បាំងមុខ, ក, ត្រចៀក និងពាក់វ៉ែនតាការពារពន្លឺព្រះអាទិត្យ លាបឡេការពារស្បែក នៅពេលចេញក្រៅ ទោះបីពេលមានពពក និងត្រូវទទួលទានទឹកឲ្យបានច្រើន និងមានវីតាមីន C បំប៉នបន្ថែមឲ្យគ្រប់គ្រាន់ និងមេត្តាបន្តយកចិត្តទុកដាក់ការពារសុខភាពឲ្យបាន ហ្មត់ចត់ជៀសវាងការឆ្លង Covd-19៕
