ម៉ូតូបុកនឹងម៉ូតូបណ្តាលឲ្យមនុស្សចំនួន5នាក់របួសធ្ងន់ស្រាលនៅក្នុងស្រុកថាឡាបរិវ៉ាត់

TNM(ខេត្តស្ទឹងត្រែង)​ ៖ យ៉ាងហោចណាស់មានមនុស្សចំនួន5 នាក់រងរបួសធ្ងន់ស្រាលក្នុងករណីគ្រោះថ្នាក់ចរាចរណ៍រវាងម៉ូតូបុកនឹងម៉ូតូ កាលពីថ្ងៃទី 16 ខែកុម្ភៈ ឆ្នាំ 2021 ស្ថិតនៅចំណុចមុខផ្ទះឈ្មោះម៉ាច លើផ្លូវលំ នៅក្នុងភូមិរំដេង ឃុំចំការលើស្រុកថាឡាបរិវ៉ាត់ ខេត្តស្ទឹងត្រែង ។

សមត្ថកិច្ចនគរបាលបានឲ្យដឹងថា អ្នកបើកបរម៉ូតូមានឈ្មោះ សឹប វណ្ណា ភេទប្រុស មានអាយុ 53 ឆ្នាំ ជនជាតិខ្មែរមុខរបរកសិកម្ម រស់នៅភូមិ ឃុំកើតហេតុខាងលើ ម៉ូតូម៉ាកវ៉េវអាខ្មៅគ្មានផ្លាកលេខបើកបរពីទិសដៅលិច ទៅកើត បានបើកទៅបុកជាមួយម៉ូតូមួយគ្រឿងទៀត ម៉ាកវ៉េវដូចគ្នា មានពណ៌ខ្មៅ គ្មានផ្លាកលេខគឺបើកបរទិសដៅពីកើត ទៅលិច ដោយទិសដៅបញ្រ្ចាសទិសគ្នា ។ សមត្ថកិច្ចនគរបាលបានបញ្ជាក់ថា អ្នកបើកបរម៉ូតូមួយគ្រឿងទៀតនិងអ្នកជិះរួមដំណើរនៅមិនទាន់បានស្គាល់អត្តសញ្ញាណនៅឡើយទេ ។ ចំណែកអ្នករងរបួស ទី1 មានឈ្មោះសឹប វណ្ណា ទទួលរងរបួសធ្ងន់បញ្ជូនយកទៅសង្គ្រោះនៅមន្ទីរពេទ្យខេត្ត (អ្នកបើកបរម៉ូតូពីកើតទៅលិច) . ទី2 អ្នកបើកបរម៉ូតូនិងអ្នករួមដំណើរដែលមានទិសដៅពីលិចទៅកើតរងរបួសធ្ងន់បញ្ជូនទៅសង្គ្រោះនៅមន្ទីរពេទ្យបង្អែកខេត្ត .ទី3 ក្មេងប្រុសចំនួន 2 នាក់ដែលទទួលរងរបួសស្រាល នាំយកមកសម្រាកព្យាបាលនៅមន្ទីរពេទ្យគ្លីនិកឯកជនក្នុងភូមិ ដោយអ្នកបើកបរម៉ូតូនិងអ្នកជិះរួមដំណើរមិនបានពាក់មួកសុវត្ថិភាពដើម្បីការពារក្បាលនោះទេ។ សមត្ថកិច្ចនគរបាលបានបញ្ជាក់បន្ថែមថាករណីគ្រោះថ្នាក់ចរាចរណ៍ខាងលើគឺបណ្ដាលមកពីអ្នកបើកបរជិះមិនប្រកាន់ស្ដាំ ចំណែកម៉ូតូរងការខូចខាតទាំងសងខាង។ ចំពោះវត្ថុតាងម៉ូតូត្រូវបានសមត្ថកិច្ចនគរបាលយកមករក្សាទុកនៅប៉ុស្តិ៍រដ្ឋបាលឃុំចំការលើ ដើម្បីរងចាំធ្វើការដោះស្រាយនៅក្រោយបន្តតាមនីតិវិធីច្បាប់៕

(ពុទ្ធា ស្ទឹងត្រែង)