អភិបាលខេត្តតាកែវ អញ្ជើញជាអធិបតីបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់ សមាគមក្រុមប្រឹក្សាក្រុង ស្រុក ឃុំ សង្កាត់ ខេត្តតាកែវ

តាកែវ៖ នៅព្រឹកថ្ងៃសុក្រ ទី២២ ខែមេសា ឆ្នាំ២០២២នេះ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ បានអញ្ជើញបិទសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ ២០២២ របស់ សមាគមក្រុមប្រឹក្សា ក្រុង ស្រុក ឃុំ សង្កាត់ ខេត្តតាកែវ ដែលបានរៀបចំដោយ សមាគមក្រុមប្រឹក្សាថ្នាក់មូលដ្ឋានខេត្តតាកែវ។ ដែលកិច្ចប្រជុំនេះបានរៀបចំធ្វើឡើងនៅសាលប្រជុំរដ្ឋបាលខេត្តតាកែវ និងក៏មានការអញ្ជើញចូលរួមដោយ លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត កងម្លាំងទាំង៣ លោក លោកស្រី អភិបាល អភិបាលរងក្រុងស្រុក ព្រមទាំង សមាជិក សមាជិកា ក្រុមប្រឹក្សា ក្រុង ស្រុក ឃុំ សង្កាត់ ជាច្រើនរូបផងដែរ។

ឆ្លៀតក្នុងឱកាសនោះដែរ ឯកឧត្តម អ៊ូច ភា អភិបាលខេត្ត ក៏ចូលរួមអបអរសាទរចំពោះសមិទ្ធផលនានា ដែលសមាគមក្រុមប្រឹក្សាក្រុង ស្រុក ឃុំ សង្កាត់ នៅមូលដ្ឋានខេត្តតាកែវ សម្រេចបានរយះពេលកន្លងមក និងសូមថ្លែងការកោតសរសើរ ចំពោះការខិតខំប្រឹងប្រែងយកអស់កម្លាំងកាយចិត្ត របស់ ថ្នាក់ដឹកនាំសមាគម ក៏ដូចជាសមាជិក សមាជិកាទាំងអស់ ដែលលះបង់មានឆន្ទះខ្ពស់បម្រើប្រជាពលរដ្ឋនៅមូលដ្ឋានទទួលបានការគាំទ្រពីសំណាក់ប្រជាពលរដ្ឋ ហេីយទន្ទឹមនេះដែរ  ត្រូវបន្តការអភិវឌ្ឍ ន៍ក្នុងមូលដ្ឋានឱ្យកាន់តែរីកចម្រេីនថែមទៀត  ដេីម្បីជាសេចក្តីត្រូវការរបស់ប្រជាពលរដ្ឋ ជាពិសេសត្រូវយកបញ្ហាពលរដ្ឋជាបញ្ហាអាទិភាពផងដែរ។

ឯកឧត្តម អ៊ូច ភា អភិបាលខេត្ត បានគូសបញ្ជាក់បន្ថែមដែរថា ប្រមុខរាជរដ្ឋាភិបាលកម្ពុជា បានដាក់ចេញនូវគោលនយោបាយភូមិ ឃុំ សង្កាត់ មានសុវត្ថិភាព ដេីម្បីធានាសុខសុវត្ថិភាព  សណ្តាប់ ធ្នាប់ សាធារណៈ ជូនពលរដ្ឋ ហេីយក្នុងនាមមន្រ្តីមូលដ្ឋានត្រូវតែអនុវត្តការងារនេះឱ្យបានល្អបំផុត ដេីម្បីភូមិឃុំយេីង  ដែលមានលក្ខណៈសម្បត្តិ ០៧យ៉ាងដូចខាងក្រោមនេះ
១-ផ្ដល់សេវាសាធារណៈ ជាពិសេសសេវារដ្ឋបាលប្រកបដោយគុណភាព តម្លាភាព និងទទួលបានជំនឿទុកចិត្ត។
២-គ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ។
៣-មានសណ្ដាប់ធ្នាប់សាធារណៈល្អ ជាពិសេសគ្មានគ្រោះថ្នាក់ចរាចរណ៍។
៤-គ្មានអំពើអនាចារ គ្មានការជួញដូរមនុស្ស ពិសេសស្រ្ដី និងកុមារ គ្មានអំពើហឹង្សាក្នុងគ្រួសារ និងគ្មានក្មេងទំនើង។
៥-ដោះស្រាយវិវាទនៅមូលដ្ឋានក្រៅប្រព័ន្ធតុលាការ ប្រកបដោយគុណភាព និងប្រសិទ្ធភាព។
៦-មានអនាម័យ មានសោភ័ណភាពល្អ និងបរិស្ថានល្អ។
៧-ឆ្លើយតបទាន់ពេលវេលាចំពោះគ្រោះមហន្តរាយ និងរាលជំងឺរាតត្បាតកាចសាហាវប្រកបដោយប្រសិទ្ធភាព៕

​សម្រួលដោយ ទៀង បុណ្ណរី