ភ្ញៀវទេសចរជាតិ និងអន្តរជាតិយ៉ាងច្រើនកុះករ បាននាំគ្នាទៅទស្សនាព្រឹត្តិការណ៍ថ្ងៃរះចំកណ្ដាលកំពូលប្រាសាទអង្គរវត្ត

បន្ទាប់ពីខកខានមិនបានទៅទស្សនាព្រឹត្តិការណ៍ថ្ងៃរះចំកណ្ដាលកំពូលប្រាសាទអង្គរវត្ត ឬ«សមរាត្រី» អស់រយៈពេល២ឆ្នាំកន្លងមក នៅព្រឹកថ្ងៃ៤រោច ខែផល្គុន ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃចន្ទ ទី២១ ខែមីនា ឆ្នាំ២០២២នេះ ភ្ញៀវទេសចរជាតិ និងអន្តរជាតិយ៉ាងច្រើនកុះករ បាននាំគ្នាទៅទស្សនាព្រឹត្តិការណ៍ថ្ងៃរះចំកណ្ដាលកំពូលប្រាសាទអង្គរវត្ត ដែលបានចាប់ផ្តើមរះពីម៉ោង៦ និង៣០នាទីព្រឹក។

លោក អ៊ឹម សុខរិទ្ធី បុរាណវិទូនៃអាជ្ញាធរជាតិអប្សរា បានឱ្យដឹងថា ព្រឹត្តិការណ៍នេះ បានកើតឡើងពីរដងក្នុង១ឆ្នាំ គឺនៅថ្ងៃទី២១ ខែមីនា និងនៅថ្ងៃទី២២ ខែកញ្ញា ។ លោកបានពន្យល់ពីព្រឹត្តិការណ៍ថ្ងៃរះចំកណ្តាលកំពូលប្រាសាទអង្គរ ឬ សមរាត្រីនេះថា គឺជាវេលាដែលពេលថ្ងៃ និងវេលាពេលយប់ មានរយៈពេលស្មើគ្នា ដោយខុសពីខែធម្មតាខ្លះ យប់មានរយៈពេលវែងជាងពេលថ្ងៃ ឬថ្ងៃមានរយៈពេលវែងជាងយប់ ហើយជាព្រឹត្តិការណ៍ទូទៅរបស់ផែនដី ដែលតែងតែកើតមាននៅក្នុងពិភពលោក។

លោកបន្ថែមទៀតថា ប្រទេសកម្ពុជាមានព្រឹត្តិការណ៍ សមរាត្រីកើតឡើងនេះ មិនមែនជារឿងចៃដន្យនោះឡើយ ព្រោះវាគឺជាលក្ខណៈពិសេសរបស់បុព្វបុរសខ្មែរ ដែលរៀបចំស្ថាបត្យកម្ម ប្លង់របស់ប្រាសាទទុកមុន ក្នុងបំណងតម្រូវតាមបាតុភូតធម្មជាតិ ដែលបង្កើតជាព្រឹត្តិ ការណ៍ថ្ងៃរះចំកណ្ដាល នៃកំពូលប្រាសាទអង្គរវត្តនេះឡើង។

លោកបន្តថា ព្រឹត្តិការណ៍ព្រះអាទិត្យស្ថិតចំកណ្ដាលនៃកណ្ដាលកំពូលប្រាសាទអង្គរវត្តនេះ ប្រហែលកើតមានតែនៅលើប្រាសាទអង្គរវត្តតែប៉ុណ្ណោះ ខណៈសំណង់បុរាណជាច្រើនផ្សេងទៀត លើពិភពលោកគឺមិនអាចរៀបចំដូច្នេះបានឡើយ។

ក្រៅពីបានទស្សនាព្រឹត្តិការណ៍ដ៏អស្ចារ្យនេះ អ្វីដែលមានការចាប់អារម្មណ៍ទៀតនោះ គឺចំនួនអ្នកទស្សនា មានច្រើនដូចកាលពីមិនទាន់មានជំងឺកូវីដ-១៩ ប៉ុន្តែយើងសង្គេតឃើញថា អ្នកទៅទស្សនាមានរបៀបរៀបរយ និងមានការពារដោយពាក់ម៉ាសផងដែរ៕ សម្រួលដោយ លោក ទៀង បុណ្ណរី