រថយន្តវេអងបុកជាមួយម៉ូតូបណ្ដាលឲ្យស្លាប់មនុស្សម្នាក់នៅស្រុកថាឡាបរិវ៉ាត់

ខេត្តស្ទឹងត្រែងៈ រថយន្តវេអងមួយគ្រឿងបើកបរខ្វះការប្រុងប្រយ័ត្នបានបុកជាមួយម៉ូតូមួយគ្រឿងដោយកៀបជាប់ម៉ូតូនៅពីក្រោមរថយន្ត បណ្ដាលឱ្យបុរសម្នាក់ជាអ្នកបើកបរម៉ូតូបានស្លាប់បាត់បង់ជីវិតភ្លាមៗនៅនឹងកន្លែង ។ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង 18 និង 30 នាទីយប់ ថ្ងៃទី 31 ខែធ្នូ ឆ្នាំ 2021 នៅចំណុចចន្លោះគីឡូម៉ែត្រលេខ 470_ 471 លើផ្លូវជាតិលេខ 9 ស្ថិតនៅភូមិថាឡាបរិវ៉ាត់ ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង។ ប្រភពពីសមត្ថកិច្ចបានឲ្យដឹងថា មុនពេលកើតហេតុ គឺរថយន្តវេអងដែលមានម៉ាក់ហុីណូពណ៌ទឹកប៊ិច មានផ្លាកលេខកំពង់ចាម 3A 5949 បានបើកធ្វើដំណើរក្នុងទិសដៅពីជើង ទៅត្បូង លុះមកដល់ចំណុចកើតហេតុខាងលើ បានបុកជាមួយម៉ូតូមួយគ្រឿងម៉ាកវីណើពណ៌ក្រហមអត់ស្លាកលេខ បើកបរបញ្រ្ចាសទិសដៅគ្នា បណ្ដាលឱ្យបុរសម្នាក់ជាអ្នកបើកបរម៉ូតូស្លាប់បាត់បង់ជីវិតនៅនឹងកន្លែងកើតហេតុភ្លាមៗ។ សមត្ថកិច្ចបានឲ្យដឹងទៀតថា បុរសដែលស្លាប់បាត់បង់ជីវិតក្នុងករណីគ្រោះថ្នាក់ចរាចរណ៍ខាងលើនេះមានឈ្មោះវ៉ាន់ សិត ភេទប្រុសអាយុ 16 ឆ្នាំមុខរបរកសិករ មានទីលំនៅភូមិផ្អាវ ឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង ចំណែកអ្នកបើកបររថយន្តមិនបានស្គាល់អត្តសញ្ញាណនោះទេ ក្រោយពេលកើតហេតុអ្នកបើកបរជាតៃកុងរថយន្តវេអងបានបើកទ្វារចុះរត់គេចខ្លួនបាត់ស្រមោល រីឯម៉ូតូរងការខូចខាតទាំងស្រុង ចំពោះរថយន្តរងការខូចខាតក្បាលខាងមុខរថយន្តមួយចំហៀង។ បន្ទាប់មកសមត្ថកិច្ចក៏បានចុះដល់ទីកន្លែងកើតហេតុ បានធ្វើការវាស់វែង បាញ់គំនូសថ្នាំផងដែរ នឹងបានយករថយន្តទៅរក្សាទុក ដើម្បីរង់ចាំធ្វើការដោះស្រាយតាមនីតិវិធីច្បាប់នៅពេលក្រោយ។ សូមបញ្ជាក់ផងដែរថាករណីគ្រោះថ្នាក់ចរាចរណ៍រខាងលើនេះគឺបណ្ដាលមកពីកត្តាបើកបរមិនប្រកាន់ស្ដាំ ចំណែកអ្នកបើកបរម៉ូតូមិនបានពាក់មួកសុវត្ថិភាព។