អភិបាលខេត្តស្វាយរៀង អញ្ជើញចូលរួមក្នុងកិច្ចប្រជុំបូកសរុបសកម្មភាពការងារ ប្រចាំឆមាសទី១ និងទិសដៅអនុវត្តបន្ត ឆ្នាំ២០២១ របស់ក្រុមការងាររាជរដ្ឋាភិបាលចុះមូលដ្ឋាននៅខេត្តស្វាយរៀង

កិច្ចប្រជុំតាមរយៈប្រព័ន្ធវីដេអូ ZOOM នេះ ក៏មានការអញ្ជើញចូលរួមពីឯកឧត្ដមទេសរដ្ឋមន្ត្រី លោកជំទាវរដ្ឋមន្ត្រី ឯកឧត្ដម លោកជំទាវរដ្ឋលេខាធិការ អនុរដ្ឋលេខាធិការ ឯកឧត្ដមនាយឧត្ដមសេនីយ៍ ឯកឧត្ដម លោកជំទាវ លោក លោកស្រី ជាប្រធាន អនុប្រធាន និងសមាជិក សមាជិកាក្រុមការងាររាជរដ្ឋាភិបាលចុះមូលដ្ឋានក្រុង ស្រុក ឯកឧត្ដម លោកជំទាវសមាជិកក្រុមប្រឹក្សាខេត្ត អភិបាលរងខេត្ត មេបញ្ជាការកងកម្លាំងទាំងបី ប្រធានមន្ទីរ-អង្គភាពនានាជុំវិញខេត្ត និងលោកអភិបាលក្រុង ស្រុកទាំង៨។

មានប្រសាសន៍ក្នុងឱកាសនោះ លោកជំទាវកិត្តិសង្គហបណ្ឌិត បានកោតសរសើរ និងវាយតម្លៃខ្ពស់ចំពោះលទ្ធផលដែលក្រុមការងារចុះមូលដ្ឋានគ្រប់ថ្នាក់ ដែល បានយកចិត្តទុកដាក់សហការ បំពេញភារកិច្ចសម្រេចបានជោគជ័យជាបន្ដបន្ទាប់ ជាពិសេស ការទប់ស្កាត់ជំងឺឆ្លងកូវីដ-១៩ ការរក្សាសន្ដិសុខ ស្ថិរភាពនយោបាយ សណ្ដាប់ធ្នាប់ សាធារណៈបានល្អប្រសើរ ក្នុងការអនុវត្តដោយជោគជ័យយ៉ាងត្រចះត្រចង់ មានការអភិវឌ្ឍលើគ្រប់វិស័យ តាំងពីថ្នាក់ខេត្តរហូតដល់គ្រប់មូលដ្ឋាន ភូមិ-ឃុំ-សង្កាត់ទូទាំងខេត្ត រួមចំណែកយ៉ាងខ្លាំងក្លាលើកកម្ពស់ជីវភាពរស់នៅរបស់ប្រជាជនកាន់តែល្អប្រសើរ បង្កើនបាន នូវជំនឿជឿជាក់លើការដឹកនាំរបស់រាជរដ្ឋាភិបាលកម្ពុជា។ ដើម្បីបន្តការតាមដាន ការអនុវត្តយុទ្ធសាស្ត្រចតុកោណតំណាក់កាលទី៤ របស់រដ្ឋាភិបាលអណត្តិទី ៦ នៃរដ្ឋសភា ក្រុមការងារត្រូវប្រឹងប្រែងរួមគ្នាបំពេញកិច្ចការសំខាន់ៗ មួយចំនួនដូចខាងក្រោម ៖

ទី១) ដោយសារជំងឺកូវីដ-១៩ បានរាលដាលចូលសហគមន៍នៅខេត្តស្វាយរៀង ដូច្នេះ ក្រុមការងារត្រូវផ្អាកការប្រជុំជាទ្រង់ទ្រាយធំជាមួយប្រជាជនមូលដ្ឋាន។ បើចាំបាច់ត្រូវប្រជុំតាម Zoom ឬប្រាស្រ័យទាក់ទងគ្នាតាមបណ្តាញសង្គម ដូចជា Telegram, messenger, WhatsApp ជាដើម ដែលជារបៀបធ្វើការតាមរបៀបបច្ចេកវិទ្យាថ្មី។

ទី២) ផ្តោតការយកចិត្តទុកដាក់ លើការជួយឧបត្ថម្ភ តាមដែលអាចធ្វើបានដល់គ្រួសារក្រីក្រដែលមានសមាជិកគ្រួសារបានទទួលមរណភាពដោយសារជំងឺកូវីដ-១៩ និងអ្នកដែលកំពុងធ្វើចតាឡីស័ក។

ទី៣) ត្រូវជំរុញថ្នាក់មូលដ្ឋានឱ្យធ្វើអំពើល្អ និងផ្តល់សេវាសាធារណៈ និងសេវាសំណូមពរឱ្យបានឆាប់រហ័ស ជូនប្រជាពលរដ្ឋដើម្បីទាក់ទាញការគាំទ្រពីពួកគាត់ លើរាជរដ្ឋាភិបាល។

ទី៤) គ្រប់ថ្នាក់ ជាពិសេស ថ្នាក់ភូមមិ ឃុំ ត្រូវចេះប្រើមធ្យោបាយបណ្តាញសង្គម។ តែត្រូវប្រើដោយប្រុងប្រយ័ត្ន និងដោយការត្រិះរិះពិចារណា គឺបង្ហោះតែសារណាដែលមានប្រយោជន៍ បង្ហោះនូវសមិទ្ធិផលដែលរាជរដ្ឋាភិបាលសម្រេចបាន។ ត្រូវចៀសសវាងនូវសារនានាដែលធ្វើឲ្យប៉ះពាល់កិត្យានុភាពជាតិ ឬប៉ះពាល់ដល់កិត្តិរបស់ថ្នាក់ដឹកនាំ ជាដើម។ល។

ទី៥) យើងត្រូវខិតខំរក្សានូវលទ្ធផលការងារដែលយើងធ្វើបាន ហើយដកពិសោធន៍ជាមួយនឹងការងារដែលយើងកំពុងនឹងប្រឈម និងការងារដែលមិនទាន់អនុវត្តបាន។

ទី៦) សូមសមត្ថកិច្ចពាក់ព័ន្ធ និងអនុគណៈកម្មការគ្រប់គ្រងច្រកទ្វារចេញ-ចូលប្រទេស និងការធ្វើចត្តាឡីស័ក ត្រូវយកចិត្តទុកដាក់ពង្រឹងសមត្ថភាពការធ្វើចត្តាឡីស័កចំពោះពលករ និងប្រជាពលរដ្ឋដែលឆ្លងដែនចូលព្រះរាជាណាចក្រកម្ពុជា ឱ្យបានម៉ត់ចត់ ដើម្បីទប់ស្កាត់ការឆ្លងរាលដាលជំងឺកូវីដ-១៩ បំប្លែងថ្មី DELTA ដ៏កាចសាហាវនេះ។

លោកជំទាវក៏បានថ្លែងអំណរគុណយ៉ាងជ្រាលជ្រៅ ចំពោះថ្នាក់ដឹកនាំថ្នាក់ជាតិ ថ្នាក់ក្រោមជាតិ និងសូមអរគុណដល់ក្រុមគ្រូពេទ្យស្ម័គ្រចិត្តសម្តេចតជោ (TYDA) ក្រុមគ្រូពេទ្យស្ម័គ្រចិត្តរបស់សម្តេចពិជ័យសេនា ទៀ បាញ់ និងក្រុមគ្រូពេទ្យស្ម័គ្រចិត្ត ហ៊ុន ម៉ានី ដែលបានអនុវត្តតាមបទបញ្ជារបស់រដ្ឋាភិបាល ដោយបានចេញអស់កម្លាំងកាយចិត្ត ចូលរួមយ៉ាងសកម្មក្នុងការបំពេញភារកិច្ចតាមការដាក់ទិសដៅរបស់រាជរដ្ឋាភិបាល បើទោះបីជាមានការប៉ះពាល់នូវសិទ្ធិខ្លះរបស់ប្រជាពលរដ្ឋ និងបានចុះយកសំណាក និងព្យាបាលអ្នកជំងឺដោយពុំខ្លាចភាពនឿយហត់ដោយស្មារតីទទួលខុសត្រូវខ្ពស់ គឺក្នុងគោលបំណងកាត់ផ្តាច់ការចម្លងនៃព្រឹត្តិការណ៍សហគមន៍ ២០កុម្ភៈ តែប៉ុណ្ណោះ៕