ប្រមុខការពារជាតិស្នើសុំការគាំទ្រពីអន្តរជាតិចំពោះកិច្ចខិតខំប្រឹងប្រែងសន្តិភាពដែលពាក់ព័ន្ធនឹងកូរ៉េខាងជើង
ការិយាល័យរបស់រដ្ឋមន្ត្រីការពារជាតិកូរ៉េខាងត្បូងបាននិយាយថា រដ្ឋមន្ត្រីក្រសួងការពារជាតិកូរ៉េខាងត្បូង លោក Suh Wook កាលពីថ្ងៃពុធបានពិភាក្សាអំពីស្ថានភាពសន្តិសុខពិភពលោកជាមួយសមភាគីរបស់លោកមកពីបណ្តាប្រទេសក្នុងតំបន់ ហើយបានអំពាវនាវឱ្យបន្តគាំទ្រដល់កិច្ចខិតខំប្រឹងប្រែងរបស់កូរ៉េខាងត្បូងក្នុងការបង្កើតសន្តិភាពយូរអង្វែងនៅឧបទ្វីបកូរ៉េ។
យោងតាមក្រសួងនេះបានឱ្យដឹងថា លោក Suh បានចូលរួមកិច្ចប្រជុំរដ្ឋមន្ត្រីការពារជាតិអាស៊ានបូកលើកទី ៨ (ADMM-Plus) ដែលបានធ្វើឡើងតាមរយៈបណ្តាញភ្ជាប់វីដេអូដែលមានការចូលរួមពីមន្ត្រីការពារជាតិកំពូលៗមកពីប្រទេសអាស៊ានទាំង ១០ និងប្រទេសជាសមាជិកដៃគូសន្ទនាចំនួន ៨ គឺប្រទេសកូរ៉េខាងត្បូង សហរដ្ឋអាមេរិក ជប៉ុន ចិន រុស្ស៊ី អូស្ត្រាលី នូវែលហ្សេឡង់ និងឥណ្ឌា។
លោក Suh បាននិយាយថា «បើគ្មានសន្តិភាពជាអចិន្ត្រៃយ៍នៅឧបទ្វីបកូរ៉េទេនោះ សន្តិភាពនៅអាស៊ីឥសាន និងអាស៊ីប៉ាស៊ីហ្វិក នឹងនៅតែមិនមានភាពពេញលេញដដែល»។
បន្ទាប់ម កលោកបានស្នើសុំការគាំទ្រជាបន្តពីបណ្តាប្រទេសជាសមាជិកទាំងនោះ ដោយលោកបានសង្កត់ធ្ងន់ទៅលើឆន្ទៈដ៏រឹងមាំរបស់រដ្ឋាភិបាលទីក្រុងសេអ៊ូលចំពោះការអនុវត្ត ខណៈដែលរក្សាជំហរត្រៀមខ្លួនដ៏រឹងមាំជាមួយសហរដ្ឋអាមេរិក។
លោក Suh ក៏បានសង្កត់ធ្ងន់ផងដែរទៅលើសារៈសំខាន់នៃកិច្ចសហប្រតិបត្តិការពហុភាគីកាន់តែស៊ីជម្រៅ ព្រោះការប្រកួតប្រជែងដើម្បីធានាដល់អនុត្តរភាពយុទ្ធសាស្ត្រកាន់តែខ្លាំងឡើង ហើយមានឱកាសនៃការប៉ះទង្គិចដោយចៃដន្យដែលជាប់ទាក់ទងនឹងផលប្រយោជន៍ភូមិសាស្ត្រនយោបាយរបស់ប្រទេសនានា។
ក្រសួងនេះបាននិយាយថា បន្ទាប់ពីកិច្ចប្រជុំនោះ លោក Suh បានជួបពិភាក្សាទ្វេភាគីជាមួយរដ្ឋមន្ត្រីការពារជាតិឡាវ លោក Chansamone Chanyalath និងបានចុះហត្ថលេខាលើអនុស្សរណៈនៃការយោគយល់គ្នាមួយដែលអំពាវនាវឱ្យមានការបង្កើនការផ្លាស់ប្តូរ និងកិច្ចសហប្រតិបត្តិការនៅក្នុងវិស័យការពារជាតិ និងឧស្សាហកម្មនានាដែលពាក់ព័ន្ធ៕ (ប្រភព Yonhab បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
