ប្រធាន JCS និងឯកអគ្គរដ្ឋទូតអូស្ត្រាលីប្តេជ្ញាជំរុញកិច្ចសហប្រតិបត្តិការយោធា
កាលពីថ្ងៃច័ន្ទ យោធាកូរ៉េខាងត្បូងបាននិយាយថា ប្រធានយោធារួម (JCS) របស់កូវ៉េខាងត្បូង ឧត្តមសេនីយ៍ Won In-Choul បានជួបជាមួយឯកអគ្គរដ្ឋទូតអូស្ត្រាលីប្រចាំនៅកូរ៉េខាងត្បូង លោកស្រី Catherine Raper និងបានពិភាក្សាអំពីស្ថានភាពសន្តិសុខនៅឧបទ្វីបកូរ៉េ និងមធ្យោបាយដើម្បីជំរុញទាក់ទងទ្វេភាគី។
ក្នុងអំឡុងពេលនៃកិច្ចពិភាក្សានោះ លោក Won បានស្នើសុំឱ្យបន្តកិច្ចសហប្រតិបត្តិការ និងការគាំទ្ររបស់អូស្ត្រាលីសម្រាប់កិច្ចខិតខំប្រឹងប្រែងរបស់រដ្ឋាភិបាលទីក្រុងសេអ៊ូលក្នុងការសម្រេចឱ្យបាននូវកម្មវិធីរំសាយអាវុធនុយក្លេអ៊ែរទាំងស្រុង និងសន្តិភាពអចិន្ត្រៃយ៍នៅឧបទ្វីបកូរ៉េ។
JCS បាននិយាយថា លោកក៏បានប្តេជ្ញាខិតខំបន្ថែមទៀតដើម្បីបង្កើនកិច្ចសហប្រតិបត្តិការជាមួយអូស្ត្រាលីនៅក្នុងវិស័យឧស្សាហកម្ម ការពារជាតិ និងអាវុធផងដែរ។
លោកស្រីឯកអគ្គរដ្ឋទូតបានសង្កត់ធ្ងន់ទៅលើការប្តេជ្ញាចិត្តរបស់លោកស្រីក្នុងការអភិវឌ្ឍបន្ថែមទៀតនូវទំនាក់ទំនងទ្វេភាគី ព្រោះឆ្នាំនេះគឺជាខួបទី ៦០ឆ្នាំនៃការបង្កើតទំនាក់ទំនងការទូតរបស់ប្រទេសទាំងពីរ។
យោងតាម JCS បានឱ្យដឹងថា លោកស្រីក៏បានចែករំលែកនូវទំនាក់ទំនងពិសេសរបស់នាងជាមួយកូរ៉េខាងត្បូង ខណៈដែលជីតារបស់លោកស្រីគឺជាកងកម្លាំងប្រយុទ្ធមួយនៅក្នុងសង្គ្រាមកូរ៉េឆ្នាំ ១៩៥០-៥៣ ហើយលោក Won ក៏បានសម្តែងការដឹងគុណចំពោះតួនាទីរបស់អូស្ត្រាលីក្នុងអំឡុងសង្គ្រាមកូរ៉េឆ្នាំ ១៩៥០-៥៣ ផងដែរ៕ (ប្រភព Yonhab បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
