ការឆ្លងជំងឺកូវីដ-១៩ ក្នុងចំណោមកុមារនៅក្នុងប្រទេសម៉ាឡេស៊ីបង្កឱ្យមានការព្រួយបារម្ភខ្លាំង
រដ្ឋមន្ត្រីក្រសួងការពារជាតិម៉ាឡេស៊ី លោក Ismail Sabri Yaakob បាននិយាយនៅក្នុងសន្និសីទសារព័ត៌មានមួយដោយធ្វើបច្ចុប្បន្នភាពអំពីស្ថានភាពជំងឺកូវីដ-១៩ នៅក្នុងប្រទេសនោះថា ការឆ្លងជំងឺកូវីដ-១៩ ក្នុងចំណោមកុមារ និងទារក គឺជាមូលហេតុនៃការព្រួយបារម្ភ ដោយសារពួកគេបានក្លាយជាក្រុមមានហានិភ័យបំផុតបន្ទាប់ពីក្រុមមនុស្សចាស់។
លោកបាននិយាយថា រហូតមកដល់ពេលនេះមានកុមារ និងទារកចំនួន ៤៨ ២៦១នាក់នៅទូទាំងប្រទេសបានឆ្លងជំងឺនេះ ដោយក្នុងចំណោមនោះមានទារកចំនួន ៦ ២៩០នាក់ដែលមានអាយុក្រោម ១៨ខែ។
អ្នកតំណាងមូលនិធិបន្ទាន់សម្រាប់កុមាររបស់អង្គការសហប្រជាជាតិ (UNICEF) ប្រចាំនៅប្រទេសម៉ាឡេស៊ី និងជាអ្នកតំណាងពិសេសរបស់ប្រទេសប្រ៊ុយណេដារូសាឡឹម វេជ្ជបណ្ឌិត Rashed Mustafa Sarwar បាននិយាយថា សាធារណៈជនត្រូវបន្តស្វែងរកវិធីថ្មី និងច្នៃប្រឌិតដើម្បីការពារកុមារនៅក្នុងប្រទេសនេះ។
លោកវេជ្ជបណ្ឌិត Rashed បាននិយាយនៅក្នុងគណនីបណ្តាញសង្គម Twitter ផ្លូវការរបស់លោកថា «អនាគតកុមាររាប់លាននាក់ពឹងផ្អែកទៅលើសកម្មភាពដែលយើងធ្វើនៅថ្ងៃនេះ។ យើងត្រូវរួមគ្នាដើម្បីរក្សាសុវត្ថិភាពពួកគេ»។
ប្រទេសម៉ាឡេស៊ីបានរាយការណ៍អំពីចំនួនអ្នកឆ្លងខ្ពស់បំផុតប្រចាំថ្ងៃរយៈពេល ២ថ្ងៃជាប់គ្នា គឺមានចំនួន ៧ ៤៧៨នាក់កាលពីថ្ងៃទី ២៦ ខែឧសភា។ តួលេខនេះបានធ្វើឱ្យចំនួនអ្នកជំងឺកូវីដ-១៩ សរុបនៅក្នុងប្រទេសនេះមានចំនួន ៥៣៣ ៣៦៧នាក់ និងមានអ្នកស្លាប់សរុបចំនួន ២ ៤៣២នាក់។
វ៉ាក់សាំងការពារជំងឺកូវីដ-១៩ ចំនួនជាង ២,៥៨លានដូសត្រូវបានផ្តល់ឱ្យប្រជាជនម៉ាឡេស៊ីរហូតមកដល់ពេលនេះ ដោយមានប្រជាជនចំនួន ៩៣៥ ៨៦៥នាក់បានទទួលការចាក់វ៉ាក់សាំងចំនួន ២ដូសរួចហើយ តាមរយៈកម្មវិធីជាតិនៃការចាក់វ៉ាក់សាំងការពារជំងឺកូវីដ-១៩៕ (ប្រភព VNA បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
