ប្រទេសសិង្ហបុរីបន្ធូរបន្ថយការរឹតត្បិតការនាំចូលអាហារពីខេត្តហ្វ៊ូគូស៊ីម៉ានៃប្រទេសជប៉ុន
នាយករដ្ឋមន្ត្រីសិង្ហបុរី លោក លី សៀនឡុង បាននិយាយថា ប្រទេសសិង្ហបុរីនឹងលុបចោលការរឹតត្បិតទៅលើការនាំចូលស្បៀងអាហារពីខេត្តហ្វ៊ូគូស៊ីម៉ារបស់ប្រទេសជប៉ុន។ ការរឹតត្បិតទាំងនេះត្រូវបានដាក់ចេញបន្ទាប់ពីគ្រោះថ្នាក់នុយក្លេអ៊ែរកាលពីក្នុងឆ្នាំ ២០១១ ។
លោក លី បានធ្វើសេចក្តីប្រកាសនេះក្នុងអំឡុងពេលនៃកិច្ចសន្ទនាតាមទូរស័ព្ទកាលពីថ្ងៃទី ២៥ ខែឧសភា ជាមួយសមភាគីជប៉ុនលោកនាយករដ្ឋមន្ត្រី យ៉ូស៊ីហ៊ីដេ ស៊ូហ្កា។
ភាគីទាំងពីរបានសន្យាថានឹងសហការគ្នានាពេលខាងមុខនេះសម្រាប់ការចែកចាយវ៉ាក់សាំងការពារជំងឺកូវីដ-១៩ ដោយត្រឹមត្រូវសម្រាប់បណ្តាប្រទេសកំពុងអភិវឌ្ឍ។
ប្រទេសសិង្ហបុរី គឺជាប្រទេសមួយក្នុងចំណោមប្រទេសទាំង ៥៤ ដែលបានដាក់ចេញនូវការរឹតត្បិតចំពោះការនាំចូលផលិតផលស្បៀងអាហារ និងផលិតផលរាវពីខេត្តហ្វ៊ូគូស៊ីម៉ា បន្ទាប់ពីមានគ្រោះថ្នាក់នៅរោងចក្រថាមពលនុយក្លេអ៊ែរ Daiichi នៅក្នុងខេត្តហ្វ៊ូគូស៊ីម៉ា។ ក្រោយមក ប្រទេសជាច្រើនបានដកចេញនូវការរឹតត្បិតនោះ ហើយនៅសល់តែប្រទេសចំនួន ១៥ ប៉ុណ្ណោះដែលនៅរក្សាការរឹតត្បិតនោះរហូតមកដល់បច្ចុប្បន្ន។
កាលពីក្នុងខែមករា ឆ្នាំ ២០២០ ប្រទេសសិង្ហបុរីបានដកចេញនូវការហាមប្រាមស្តីពីការនាំចូលស្បៀងអាហារពីទីក្រុងមួយចំនួននៅខេត្តហ្វ៊ូគូស៊ីម៉ាដោយមានលក្ខខ័ណ្ឌនៃការដឹកជញ្ជូនត្រូវតែមានលិខិតបញ្ជាក់នូវទីកន្លែងប្រភពដើមរបស់ផលិតផលទាំងនោះ ព្រមទាំងមានត្រួតពិនិត្យសម្រាប់សារធាតុវិទ្យុសកម្ម។
លោកនាយករដ្ឋមន្ត្រី ស៊ូហ្កា និងសមភាគីលោក លី សៀនឡុង ក៏បានព្រមព្រៀងគ្នាផងដែរក្នុងការធ្វើការងារជាមួយគ្នាដើម្បីសម្រេចបាននូវសេរីភាព និងការបើកចំហនៅតំបន់ឥណ្ឌូ-ប៉ាស៊ីហ្វិក ដែលរួមទាំងការបង្កើនកិច្ចសហប្រតិបត្តិការសេដ្ឋកិច្ច និងការពារជាតិ៕ (ប្រភព VNA បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
