ប្រទេសឥណ្ឌូណេស៊ីព្យាករកំណើនសេដ្ឋកិច្ចចំនួន ៨,៣ភាគរយនៅក្នុងត្រីមាសទី ២
លោកស្រី Sri Mulyani Indrawati រដ្ឋមន្ត្រីក្រសួងហិរញ្ញវត្ថុឥណ្ឌូណេស៊ីបាននិយាយនៅក្នុងកិច្ចប្រជុំសភាកាលពីពេលថ្មីៗនេះជាមួយគណៈកម្មាធិការទី ៩ នៃសភាតំណាងរាស្ត្រថា កំណើនសេដ្ឋកិច្ចរបស់ប្រទេសឥណ្ឌូណេស៊ីត្រូវបានគេព្យាករថានឹងឈានដល់ចន្លោះពី ៧,១ ទៅ ៨,៣ភាគរយនៅក្នុងត្រីមាសទី ២ នៃឆ្នាំនេះ។
ការព្យាករនេះមានចំនួនខ្ពស់ជាងការព្យាកររបស់ប្រធានាធិបតី លោក ចូកូ វីដូដូ ដែលមានចំនួន ៧ភាគរយ។
លោកស្រីរដ្ឋមន្ត្រីរូបនេះបាននិយាយថា ការព្យាករចុងក្រោយនេះមានចំនួនខ្ពស់ជាងកំណើនអវិជ្ជមាន ០,៧ភាគរយដែលបានកត់ត្រានៅក្នុងត្រីមាសទី ១ ដោយត្រូវបានធ្វើឡើងដោយផ្អែកទៅលើការកើនឡើងនៃសន្ទស្សន៍ដែលបានរំពឹងទុក។ ការប្រើប្រាស់ក្នុងគ្រួសារបានរួមចំណែកធំបំផុតដល់កំណើនសេដ្ឋកិច្ចដែលត្រូវបានគេព្យាករថានឹងកើនឡើងពី ៦ ទៅ ៦,៨ភាគរយ ការចំណាយរបស់រដ្ឋាភិបាលមានពី ៨,១ ទៅ ៩,៧ភាគរយ ការវិនិយោគមានពី ៩,៤ ទៅ ១១,១ភាគរយ ការនាំចេញមានពី ១៤,៩ ទៅ ១៩,៧ភាគរយ និងការនាំចូលមានពី ១៣ ទៅ ១៩,៧ភាគរយ។
យោងតាមលោកស្រីរដ្ឋមន្ត្រីរូបនេះបានឱ្យដឹងថា សន្ទស្សន៍ជាច្រើនបានកើនឡើងនៅក្នុងខែមេសា និងខែឧសភា រួមទាំងតម្លៃទំនិញនៅលើទីផ្សារពិភពលោក សន្ទស្សន៍អ្នកគ្រប់គ្រងការទិញពិភពលោក (PMI) បានឈានដល់កម្រិតខ្ពស់បំផុតចាប់តាំងពីខែមេសា ឆ្នាំ ២០១០ មក។
សន្ទស្សន៍នៃទំនុកចិត្តអ្នកប្រើប្រាស់ឥណ្ឌូណេស៊ី (CCI) ក៏មានការកើនឡើងពី ៩៣,៤ ដល់ ១០១,៥ ផងដែរកាលពីក្នុងខែមេសា ហើយការប្រើប្រាស់ថាមពលបានកើនឡើង ៦,៣ភាគរយបើប្រៀបធៀបទៅនឹងកំណើនអវិជ្ជមាននៅក្នុងត្រីមាសមុន។
លើសពីនេះទៀត ទាំងការនាំចូល និងការនាំចេញត្រូវបានគេមើលឃើញថាមានការកើនឡើង ហើយស្ថានភាពជំងឺកូវីដ-១៩ នៅក្នុងប្រទេសឥណ្ឌូណេស៊ីស្ថិតក្រោមការគ្រប់គ្រងបាន។
ទោះជាយ៉ាងណា ការព្យាកររបស់លោកស្រី Sri Mulyani ស្តីពីកំណើនសេដ្ឋកិច្ចសម្រាប់ឆ្នាំ ២០២១ នៅតែមិនផ្លាស់ប្តូរ គឺនៅត្រឹម ៤,៥ ទៅ ៥,៣ភាគរយ៕ (ប្រភព VNA បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
