ក្មេងទំនើងពីរក្រុមកាន់ដាវនិងកាំបិតកាប់ចាក់គ្នាដូចរឿងកុនចាក់ចំយុវជនម្នាក់ជាប់ផ្លែដាវនិងឆ្អឹងខ្នងបណ្ដាលឲ្យរងរបួសធ្ងន់

TNM(ខេត្តស្ទឹងត្រែង) ៖ ក្មេងទំនើងចំនួន 2 ក្រុមឈ្លោះដេញកាប់ចាក់គ្នា ខ្លះកាន់កាំបិតកាន់ដាវ ដូចនៅក្នុងរឿងកុនហុងកុងខណៈពេលនោះ បានចាក់ចំយុវជនម្នាក់ជាប់ផ្លែដាវនឹងឆ្អឹងខ្នងបណ្ដាឲ្យរងរបួសយ៉ាងធ្ងន់ធ្ងរ ហេតុការណ៍នេះបានកើតឡើងកាលពីវេលាម៉ោង 6និង30 នាទីព្រលប់ ថ្ងៃទី 27 ខែមេសា ឆ្នាំ 2021 នៅត្រង់ចំណុចមុខវត្តឆ្វាំង ស្ថិតនៅក្នុងភូមិឆ្វាំង ឃុំសំអាង ស្រុកថាឡាបរីវ៉ាត់ ខេត្តស្ទឹងត្រែង ។

សមត្ថកិច្ចបានឲ្យដឹងថា ករណីក្មេងទំនើងដេញកាប់ចាក់គ្នាមាន 2 ក្រុមបានធ្វើសកម្មភាពកាប់ចាក់គ្នានៅចំណុចខាងលើ ហើយភាគ្គីខាងរងគ្រោះមានមានបក្សពួកគ្នីគ្នាចំនួន 3 នាក់ ។ ទី1មានឈ្មោះ គង់ នី ភេទប្រុសមានអាយុ 16 ឆ្នាំ បានរបួសធ្ងន់ជាប់ផ្លែដាវនឹងឆ្អឹងខ្នង ទី2ឈ្មោះឡេ សំឡេង ប្រុសអាយុ 15 ឆ្នាំនិងទី 3 ឈ្មោះសឿន សេង ភេទប្រុសអាយុ 15 ឆ្នាំ អ្នកទាំងបីនាក់រស់នៅក្នុងភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ។ សមត្ថកិច្ចបានប្រាប់បន្តថា ចំណែកភាគីក្មេងទំនើងម្ខាងទៀត ពុំទាន់បានស្គាល់អត្តសញ្ញាណនៅឡើយទេ នៅពេកចាក់ជនរងគ្រោះជាប់ផ្លែដាវនឹងឆ្អឹងខ្នងរួចហើយ ក្រោយធ្វើសកម្មភាពភាគីក្មេងទំនើងម្ខាងដែលមិនបានស្គាល់អត្តសញ្ញាណខាងលើនោះ បានរត់គេចខ្លួនបាត់ ដោយឡែកជនរងគ្រោះត្រូវបានក្រុមគ្រួសារដឹកបញ្ជូនយកទៅសង្គ្រោះនៅឯមន្ទីរពេទ្យបង្អែកខេត្តស្ទឹងត្រែង។

រីឯក្រុមក្មេងទំនើរម្ខាងទៀតដែលជាជនបង្កដៃដល់បានចាក់ជនរងគ្រោះឈ្មោះគង់ នី ខាងលើនោះ ឥឡូវនេះសមត្ថកិច្ចកំពុងតាមដានចុះស្រាវជ្រាវ ដើម្បីស្វែងរកចាប់ខ្លួនបក្សពួកជនដែលបង្កនោះ យកមកផ្ដន្ទាទោសទៅតាមផ្លូវច្បាប់។(ពុទ្ធា ស្ទឹងត្រែង)