អាជ្ញាធរស្រុកថ្មគោលប្រកាសមិនឱ្យកសិករធ្វើស្រែប្រាំងនៅដើមឆ្នាំនេះទេ
ខេត្តបាត់ដំបង ៖ អាជ្ញាធរស្រុកថ្មគោលបានចេញលិខិតជូនដំណឹងមួយ កាលពីថ្ងៃទី១០ មករា ជូនដល់ប្រជាកសិករទាំង១០ឃុំ នៅក្រោមការគ្រប់គ្រងរដ្ឋបាលរបស់ខ្លួន ក្នុងកម្មវត្ថុ៖ «ហាមឃាត់ការបង្ករបង្កើនផលស្រូវសម្រាប់រដូវប្រាំងឆ្នាំ២០១៤នេះ ក្រោមហេតុផលពុំមានទឹកស្រោចស្របគ្រប់គ្រាន់ ដែលនាំឲ្យខាតបង់» ធ្វើឲ្យផ្ទៃដីសម្រាប់ធ្វើស្រែប្រាំងរបស់កសិករប្រមាណ៥០០០ហិកតា នៅក្នុងស្រុកថ្មគោលត្រូវទុកដីឱ្យទំនេរ ។ យោងតាមលិខិតជូនដំណឹងរបស់អភិបាលស្រុកថ្មគោល លោក ជា សម្បត្តិ បានឲ្យដឹងថា ផ្ទៃដីកសិកម្មមួយចំនួនធំ សម្រាប់ធ្វើស្រូវប្រាំងរបស់ប្រជាកសិករ គឺទទួលបានប្រភពទឹកពី«ស្ទឹងបវេល និងទឹកអាងកំពីងពួយ»។ ដូច្នេះ បើតាមការពិនិត្យស្ថានភាពទឹកស្ដុកបច្ចុប្បន្នក្នុងប្រព័ន្ធស្រោចស្រប «អាងកំពីងពួយ និងស្ទឹងបវេល» ដែលជាប្រភពទឹកសំខាន់នាពេលនេះ មានបរិមាណទឹកតិចតួច ដែលមានមិនអាចធានានូវការផ្គត់ផ្គង់ និងការស្រោចស្របស្រូវប្រាំងស្របតាមតម្រូវការ នៃការដាំដុះបានឡើយ ។ នៅក្នុងសេចក្ដីជូនដំណឹងដដែលនេះ លោកអភិបាលស្រុកថ្មគោល បានដាក់ចេញនូវវិធានការ២ចំណុច ដើម្បីស្នើឲ្យប្រជាកសិករត្រូវតែអនុវត្តដែលជាការចូលរួមទប់ស្កាត់ ចៀសវាងនាំឲ្យមានការខាតបង់ ។ ទី១-មិនអនុញ្ញាតឲ្យប្រជាកសិករបង្កបង្កើនផលដំណាំស្រូវប្រាំងសម្រាប់ឆ្នាំនេះ ចាប់ពីថ្ងៃទី១៥ មករា ឆ្នាំ២០១៤ នេះតទៅ ។ ទី២-មិនអនុញ្ញាតឲ្យប្រជាកសិករបូមទឹកចេញពីបឹងអភិរក្សឡើយ ព្រោះជាកន្លែងសម្រាប់រក្សាត្រីពូជ។ នៅក្នុងរដ្ឋបាលស្រុកថ្មគោល មានឃុំចំនួន១០ ដែលប្រជាពលរដ្ឋភាគច្រើនលើសលប់មានមុខរបរបង្កបង្កើនផលស្រូវ ។ ប្រជាកសិករតែងធ្វើស្រែជាប្រចាំក្នុងរដូវរស្សា ហើយពួកគេនឹងចាប់ផ្ដើមបន្តធ្វើស្រូវប្រាំងថែមទៀត ក្រោយប្រមូលផលស្រូវវស្សា។ បើតាមការកត់សម្គាល់ ការបង្កបង្កើនផលស្រូវប្រាំងរបស់ប្រជាកសិករមួយចំនួន ក្នុងចំណោមទាំង១០ឃុំនេះ គឺទទូលបានប្រភពទឹកស្រោចស្របពី«អាងកំពីងពួយផង និងពីស្ទឹងបវេលផង»។ ប៉ុន្តែគេសង្កេតឃើញមានតែឃុំចំនួន០២ប៉ុណ្ណោះ ដែលទទួលបានពីប្រភពទឹក«អងកំពីងពួយ»ស្រោចស្របពេញលិចជាងគេ គឺឃុំអន្លង់រុន និងឃុំអូរតាគី។ លោក ស៊ី សាវុធ មេឃុំអន្លង់រុន ដែលដែលឃុំរបស់លោក សំបូរកសិករធ្វើស្រែប្រាំងច្រើនជាងឃុំដទៃទៀត បានថ្លែងប្រាប់អ្នកសារព័ត៍មាន នៅព្រឹកថ្ងៃទី១១ មករា នេះថា ប្រជាពលរដ្ឋនៅក្នុងឃុំរបស់លោកសព្វថ្ងៃពួកគេនិយមធ្វើស្រូវប្រាំង ច្រើនជាងធ្វើស្រូវវស្សា បើទោះជានៅក្នុងរដូវវស្សា
ក្ដី។ ព្រោះធ្វើស្រូវប្រាំងឆាប់ទទូលផល និងមានរយៈពេលខ្លីនៃការប្រមូលផល។ លោកមេឃុំបានប្រាប់ថា កន្លងទៅឃុំអន្លង់រុន មានផ្ទៃដីចន្លោះពី១០០០ហិចតា ទៅដល់១៥០០ហិចតាប៉ុណ្ណោះ សម្រាប់ធ្វើស្រូវប្រាំងនៅក្នុងប្រព័ន្ធស្រោចស្រប ពឹងផ្អែកទាំងស្រុងពីប្រភពទឹក«អាងកំពីងពួយ» ដែលកំណត់ដោយមន្ទីរធនធានទឹក និងឧតុនិយមខេត្ត។ ប៉ុន្តែដោយសារសព្វថ្ងៃនេះ មានប្រជាពលរដ្ឋកាន់តែច្រើននិយមធ្វើស្រូវប្រាំង ទើបសព្វថ្ងៃនេះផ្ទៃដីដែលពលរដ្ឋធ្វើស្រូវប្រាំងបានកើនឡើងរហូតដល់ជិត២៥០០ហិកតា ក្នុងចំណោមដីកសកម្មនៅឃុំទាំងមូលប្រមាណ៦០០០ហិចតា ។ បើតាមលោក ស៊ី សាវុធ បានបញ្ជាក់ថា ពេលនេះ ប្រជាកសិករកំពុងត្រៀមប្រមូលផលស្រូវប្រាំងវគ្គទី០២ តែក្រោយប្រមូលរួច យើងមិនអនុញាតឲ្យប្រជាកសិករវាយដីធ្វើស្រូវបន្តទៀតទេ។ ព្រោះនេះ ជាការហាមឃាត់របស់ថ្នាក់លើ ដោយហេតុថា ឆ្នាំនេះយើងខ្វះទឹកសម្រាប់ផ្គត់ផ្គង់ស្រោចស្រប។ ហើយនេះក៏ជាការជូនដំណឹងពីខាងមន្ទីរធនធានទឹក និងឧតុនិយមខេត្តដែរ ។ ជុំវិញការជូនដំណឹងរបស់អាជ្ញាធរស្រុកថ្មគោល ដែលហាមមិនឲ្យធ្វើស្រូវប្រាំងបន្តខាងលើនេះ ប្រជាកសិករមួយចំនួននៅស្រុកថ្មគោល ហាក់មិនសប្បាយចិត្ត តែពួកគេក៏ស្វែងយល់ពីផលលំបាកផងដែរ ពីស្ថានភាព នៃប្រភពផ្គត់ផ្គង់ទឹក។ ប្រជាកសិករខ្លះបានពោលថា ជារៀងរាល់ឆ្នាំ គាត់តែងជួលស្រែគេធ្វើ ។ ប៉ុន្តែគាត់មិនសូវរំពឹងលើស្រូវវស្សាទេ ព្រោះអាចជួបគ្រោះរាំងស្ងួត ឬ គ្រោះទឹកជំនន់ធ្វើឲ្យខូចខាតស្រូវរកប្រាក់សងម្ចាស់ស្រែគ្មាន។ គាត់ពឹងផ្អែកស្ទើរទាំងស្រុងទៅលើការធ្វើស្រូវប្រាំង ដែលគាត់អាចទទូលបានផលយ៉ាងតិចក៏៨០% ដែរ។ ដូច្នេះគាត់ស្ដាយនៅពេលមិនបានធ្វើស្រូវប្រាំងចុងដៃបែបនេះ តែគាត់មិនទោម្នេញនឹងការហាមឃាត់របស់អាជ្ញាធរទេ ព្រោះបើពិនិត្យលើស្ថានប្រភពទឹកស្រោចស្របជាក់ស្ដែង អាចនឹងខ្វះខាងមែន ។ យ៉ាងណាក្ដី បើតាមលោកជា សម្បត្តិ អធិបាលស្រុកថ្មគោលបានលើកឡើងអំពីវិធានការរបស់លោកខាងលើនេះថា ការហាមឃាត់មិនអនុញាតឲ្យប្រជាកសិករធ្វើស្រូវប្រាំងក្នុងដើមឆ្នាំ២០២៤ នេះ គឺដោយសារខាងមន្ទីរធនធានទឹក និងឧតុនិយម បានជូនដំណឹងអំពីការខ្វះខាតទឹកស្រោចស្របដំណាំស្រូវប្រាំងនេះ។ ដូច្នេះ ចៀសវាងកុំឲ្យពលរដ្ឋជួយបញ្ហា និង ជួបការខាតបង់ លោកត្រូវតែរារាំងមិនឲ្យពលរដ្ឋបង្កបង្កើនដំណាំស្រូវប្រាំងឡើយ ។ លោកបានណែនាំឲ្យលោកមេឃុំ គ្រប់ឃុំទាំង១០ នៅក្នុងស្រុកថ្មគោល ត្រូវធ្វើការណែនាំដល់ប្រជាពលរដ្ឋនៅក្នុងមូលដ្ឋានរបស់ខ្លួន និងត្រូវចុះតាមដានជាប្រចាំ ដើម្បីពិនិត្យសកម្មភាពពលរដ្ឋធ្វើស្រូវប្រាំង ដោយមិនអនុញ្ញាតឲ្យប្រជាកសិករវាយដីធ្វើស្រូវប្រាំងបន្តទៀតឡើយ ក្រោយបញ្ចប់ការប្រមូលផលស្រូវប្រាំងក្នុងរយៈពេលដ៏ឆាប់ខាងមុខនេះ ៕ សម្រួលដោយ ទៀង បុណ្ណរី
