ស្ទើរស្រក់ទឹកភ្នែក! ក្មេងស្រីកំព្រាខ្ចប់បាយ១ដុំ សាច់១ចំណិតមកសាលាដូរចំណេះដឹង
ខេត្តបាត់ដំបង ៖ បាយមួយចានដូរចំណេះមួយថ្ងៃ…! ក្មេងស្រីកំព្រាម្នាក់បានខ្ចប់បាយយកមកសាលារៀន ពិតជាអង្រួនចិត្តមហាជនជាខ្លាំង ព្រោះតែជីវិតខ្វះខាត សូម្បីតែគ្រូដែលជាម្តាយទី២ ក៏ស្ទើរតែស្រក់ទឹកភ្នែក នៅពេលបានឃើញពីការតស៊ូរបស់ក្មេងស្រីរូបនេះ។ ពិតមែនហើយ ជីវិតមនុស្សម្នាក់ៗកើតមកគ្មាននរណាចង់ក្រនោះឡើយ ដូចជាក្មេងស្រីដែលកំព្រាឪពុករូបនេះ ទោះបីជានាងខ្វះខាត ទោះបីជានាងគ្មានឪពុក ហើយមិនទទួលបានការថ្នាក់ថ្នមពីម្តាយក៏ពិតមែន ប៉ុន្តែនាងនៅតែជម្នះ និងតស៊ូដើម្បីការសិក្សា យកបាយមួយដុំ សាច់មួយចំណិត ដាក់ចានច្រកថង់មកសាលារៀបហូបពេលម៉ោងចេញលេង ដើម្បីចម្អែតក្រពះ និងប្រឹងសិក្សាក្រេបយកចំណេះពីគ្រូបង្រៀន។ ប្រាកដណាស់ ពាក្យគ្រូមួយម៉ាត់ ពិតជាមានតម្លៃណាស់ ដូចពាក្យចាស់ពោលថា «នៅផ្ទះម្ដាយទីទៃ នៅព្រៃម្ដាយតែមួយ»។ ដោយនាងតូចរូបនេះ ទោះបីជាម្តាយមានគ្រួសារថ្មី ឪពុកស្លា.ប់ចោលក៏ពិតមែន ប៉ុន្តែនាងនៅតែទទួលបានការសន្តោសប្រណី និងផ្តល់ការថ្នាក់ថ្នមពីគ្រូ ផ្តល់ចំណេះដឹង ជួយជាសម្ភារៈផ្សេងៗដល់ប្អូនផងដែរ។ ទឹកចិត្តគ្រូ មិនខុសពីទឹកចិត្តម្តាយនោះឡើយ ដោយឃើញកូនសិស្សខ្វះខាត លំបាក ក៏គ្រូមិនមើលនឹងភ្នែកដែរ ដូច្នេះនៅពេលដែលរៀនចប់ ទទួលបានការងារល្អ ប្រាក់ខែច្រើន កុំភ្លេចនឹកដល់មនុស្សម្នាក់ជាម្តាយទី២ ដែលតែងតែកាន់ដៃប្អូនសរសេរអក្សរ បារម្ភពីប្អូន។ ហើយទឹកចិត្តជាគ្រូមិនចង់បានអ្វីពីកូននោះឡើយ គឺចង់បានត្រឹមឃើញកាលដែលចាប់ដៃកូនសរសេរអក្សរជាលើកដំបូង គឺម្តាយរូបនេះហើយ ជាអ្នកបានផ្តល់ការថ្នាក់ថ្នមដល់កូនមុនគេនៅក្នុងសាលារៀននោះ។ តាមរយៈបទសម្ភាសន៍ជាមួយសារព័ត៌មាន អ្នកគ្រូ រិន ថាវី ត្រូវជាគ្រូរបស់ប្អូនផ្ទាល់ បានប្រាប់អោយដឹងថា «ប្អូនគឺជាក្មេងស្រីដែលឧស្សាហ៍ព្យាយាមជាមួយការសិក្សា ទោះបីជាចម្ងាយដែលប្អូនធ្វើដំណើរមកសាលារៀង ឆ្ងាយបន្តិចមែន ក៏ប្អូនមិនដែលត្អូញត្អែរនោះដែរ»។ អ្នកគ្រូ រិន ថាវី ជាគ្រូបង្រៀននៅក្នុងសាលាបឋមសិក្សា «ពីងពង់» ស្ថិតនៅក្នុងភូមិពីងពង់ ឃុំល្វា ស្រុកបរវិល ខេត្តបាត់ដំបង បានប្រាប់បន្តថា «កូនសិស្សរបស់អ្នកគ្រូដែលខ្វះខាតនេះ មានឈ្មោះ មេត្តា សុខនី រៀនថ្នាក់ទី២ អាយុ៧ឆ្នាំ នាងតែងតែដាក់បាយមកសាលារៀន ដោយពេលខ្លះមានលុយ៥០០រៀល ពេលខ្លះទៀតមាន១០០០រៀល។ ហើយនាងជួនកាលគ្មាន ក៏បានដាក់បាយមកសាលាក៏មានដែរ ដូចបងប្អូនបានឃើញស្រាប់ហើយ បាយមួយដុំ ដូរចំណេះមួយថ្ងៃ ទោះបីជាមានត្រឹមអំបិល ឬសាច់មួយដុំក៏អាចអោយប្អូនរស់បាន និងធំធាត់ឡើងដែរ»។ អ្នកគ្រូ ថាវី ត្រូវជាគ្រូ បានបន្តថា «កាលពីកន្លងទៅ នាងបាននិយាយប្រាប់អ្នកគ្រូថា នាងជាកូនកំព្រា ឪពុកស្លា.ប់ចោល ម្តាយមានគ្រួសារថ្មី ដោយនាពេលបច្ចុប្បន្ននេះ នាងរស់នៅជាមួយយាយ តែមិនមែនជាយាយបង្តើតនោះឡើយ។ សុខនី ក្មេងស្រីដ៏កម្សត់ នាងតែងតែឧស្សាហ៍ជាមួយការសិក្សារបស់នាង ទោះនាងកើតមកខ្វះខាត ពុំសូវទទួលបានការថ្នាក់ក៏ពិតមែន តែនាងក៏នៅតែប្រឹងប្រែងជាមួយការសិក្សា ពោលគឺមានតែចំណេះទេ ដែលជាស្ពាន ហើយអាចចម្លងប្អូនបាននោះ»។ អ្នកគ្រូ រិន ថាវី ដែលបង្រៀននៅបឋមសិក្សាពីងពង់ បានបន្តទៀតថា «ថ្នាក់ដែលអ្នកគ្រូបង្រៀន កឺមានកូនសិស្សចំនួន៣២នាក់ ហើយក្រៅពី សុខនី ដ៏កម្សត់ ក៏នៅមានសិស្ស២នាក់ទៀតដែលកំព្រា និងខ្វះខាតដូចគ្នា»។ ដូច្នេះជាធម្មតា អ្នកគ្រូតែងតែបង្ហើបប្រាប់អោយដឹងថា ពេលឃើញសិស្សខ្វះខាតដូច្នេះ ក៏អ្នកគ្រូបានជួយជាសម្ភារៈ ចំណីអាហារ និងជួនកាលអង្ករទៀតផង»៕ សម្រួលដោយ ទៀង បុណ្ណរី
