សូមប្រយ័ត្ន! ពេលមេឃកំពុងភ្លៀង ជាក់ស្តែង រន្ទះបា.ញ់មនុស្សស្លាប់ម្នាក់
ខេត្តសៀមរាប ៖ បុរសម្នាក់ខណៈចុះដើរទៅមើលស្រូវក្នុងពេលមេឃកំពុងធ្លាក់ភ្លៀង ក៏ត្រូវរន្ទះមកបាញ់បណ្តាលឱ្យស្លាប់ភ្លាមៗយ៉ាងអាណោចអាធ័ម ដែលហេតុការណ៍បានកើតឡើង កាលពីវេលាម៉ោង១៥ និង៤០នាទីរសៀលថ្ងៃទី ១១ ខែវិច្ឆិកា ឆ្នាំ២០២៣ ត្រង់ ចំណុចខ្នងទំនប់ថ្លុកតាសាយ ខាងជើងភូមិត្រុំខាងជើង ឃុំជ្រោយនាងងួន ស្រុកស្រីស្នំ ចម្ងាយ៣.០០០ម៉ែត្រពីភូមិ ។ បើតាមលោកវរសេនីយ៍ឯក អ៊ុន ស្រស់ អធិការនគរបាលស្រុកស្រីស្នំបានឱ្យដឹងថា ជនរងគ្រោះខាងលើ ឈ្មោះ សុស សីហា ភេទប្រុស អាយុ២៣ឆ្នាំ ជាកសិករ មានទីលំនៅបច្ចុប្បន្នភូមិត្រុំខាងជើង ឃុំជ្រោយនាងងួន ស្រុកស្រីស្នំ ខេត្តសៀមរាប ។ ប្រភពបន្តថា ជនរងគ្រោះនាំម៉ាស៊ីនច្រូតទៅច្រូតស្រូវនៅក្បែរចំណុចកើតហេតុខាងលើ ប៉ុន្តែមិនទាន់ដល់ស្រែផង ខណៈ កំពុងតែដើរទៅ ស្រាប់តែមានមេឃភ្លៀង ខ្យល់ ហើយក៏ត្រូវរន្ទះ បាញ់ស្លាប់ និងទូរស័ព្ទរបស់ជនរងគ្រោះ១គ្រឿងក៏ខូចខ្ទេចផងដែរ ។ បច្ចុប្បន្ន ជនរងគ្រោះត្រូវបានកម្លាំងនគរបាលជំនាញ ប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ។ សម្រួលដោយ ទៀង បុណ្ណរី
