បន្លែដាំដំណាំបន្ទាប់បន្សំលើដីជុំវិញផ្ទះ ផ្លាស់ប្តូរជីវភាពគ្រួសារមួយចាកផុតពីភាពក្រីក្រ
ពលរដ្ឋមួយគ្រួសារដែលអ្នកភូមិដឹងថាជាក្រុមគ្រួសារមួយមានជីវភាពក្រីក្រ តែបានខិតខំកែច្នៃមុខរបរតាមរយៈការដាំដុះដំណាំជុំវិញផ្ទះដើម្បីរកចំណូលលើកស្ទួយជីវភាពរស់នៅប្រចាំថ្ងៃ។ ក្នុងវ័យ ៦៣ ឆ្នាំ អ្នកស្រី វណ្ណថា រស់នៅភូមិប៉ៃឡាំ ឃុំចែងមានជ័យ ស្រុកបាណន់ ជាមួយកូនស្រី ២ នាក់ទៀត។ ស្រ្តីរូបនេះបានឲ្យដឹងថា ដោយសារតែភាពក្រីក្របានជំរុញឲ្យអ្នកស្រីនិងក្រុមគ្រួសារ បានកែប្រែដីភូមិដែលមិនមានទំហំធំប៉ុន្មានឲ្យក្លាយជាដីដែលមានផលប្រយោជន៍ ផ្តល់សេដ្ឋកិច្ចគ្រួសារវិលជុំតាមរយះការដាំដុះបន្លែចម្រុះនៅលើដីជុំវិញផ្ទះ។ ស្រ្តីរូបនេះបានបន្តថា សម័យនេះមិនដូចសម័យ ប៉ុល ពត ដែលបានបិទសិទ្ធិគ្រប់ច្រកល្អកសូម្បីតែដំណាំដាំដោយខ្លួនឯងក៏គ្មានសិទ្ធិយកទៅបរិភោគ។ បច្ចុប្បន្នបើក្រខ្សត់អត់មានសេដ្ឋកិច្ចផ្គត់ផ្គង់ក្នុងគ្រួសារ គឺដីលំនៅឋានម្នាក់ៗនេះហើយជាប្រភពចំណូលនៃសេដ្ឋកិច្ចគ្រួសារ បើទោះបីមិនមានបានហូរហៀក៏បានធ្វើឲ្យជីវភាពគ្រួសារមិនធ្លាក់ក្នុងរណ្តៅអត់ឃ្លាននិងក្រីក្រពេកនោះដែរ។ ក្នុងសកម្មភាពកំពុងដើរប្រមូលផលដំណាំ ដើម្បីយកទៅលក់លើទីផ្សារប្រចាំថ្ងៃ លោកស្រី ខន ធឿន ជាកូនស្រីអ្នកស្រី វណ្ណថា បានផ្តល់បទសម្ភាសដល់កម្ពុជាថ្មីថា នៅព្រឹកនេះមានម៉ូយនៅផ្សារបានកុម្មង់ឲ្យអ្នកស្រីកាត់និងបេះបន្លែ ៣ មុខក្នុងនោះមានផ្លែត្រប់ពុតញង ផ្លែសណ្តែកគួ និងផ្លែម្ទេស ក្នុងមួយមុខៗ ១០ គីឡូក្រាម។ ដំណាំដាំដុះក្នុង ១ ខែ ស្រ្តីរូបនេះយ៉ាងហោចក៏អាចប្រមូលផលចូលទីផ្សារបានពី ៣ ទៅ ៤ បើគិតជាប្រាក់ចំណូលប្រចាំខែក៏បានគ្រាន់បើដែរ។ ស្រ្តីរូបនេះបន្តទៀតថា កាលពីព្រឹកមិញត្រូវថ្ងៃទី ០៨ ខែវិច្ឆិកា អ្នកស្រីលក់បានជាង ១០ មុឺនរៀលលើបន្លែ ៣ មុខ ហើយក្នុងនោះផ្លែត្រប់ពុតញង បើលើកឲ្យម៉ូយ ១ គីឡូក្រាមបាន ៣ ពាន់រៀល បើលក់ខ្លួនឯងបានពីចន្លោះ ៤-៥ ពាន់រៀលក្នុង១ គីឡូក្រាម ហើយម្ទេសក៏បានគួរសមដែរ។ “បើនិយាយទៅដំណាំខ្ញុំនិងម៉ែខ្ញុំនាំគ្នាដាំនេះ គឺចម្រុះតាមតម្រូវការជាបន្លែប្រចាំថ្ងៃ អាចលក់បានរាល់ថ្ងៃ ព្រោះយើងដាំឆ្លាស់ពេលគ្នា បើលក់អស់មួយសារមួយសាទៀតវាបានហុចផលដែរ ហើយពេលខ្លះមួយខែយ៉ាងហោចក៏ម៉ូយកុម្ម៉ង់ទិញបាន ៣ ដងឬ ៤ ដងដែរ”។ នេះបើតាមអ្នកស្រី ខន ធឿន។ និយាយពីជីវភាពអ្នកស្រីបានអះអាងថាបានប្រសើរជាងមុនដែលរកមួយថ្ងៃបានមួយថ្ងៃ តាមរយះដើរស៊ីឈ្នួលគេ ដូចជាកាច់ ផ្លែពោត ដកដំឡូង ចិញ្ច្រាំឡូង ជាដើម។ តែពេលនេះអ្នកស្រីអត់ដើរសុីឈ្នួលគេទៀតផង រយះពេលជិត ១ ឆ្នាំនេះ គឺមើលថែនិងដាំបន្លែដោយខ្លួនឯង ដោយមុខរបរនេះគ្រាន់បើដែរឲ្យតែយើងឧស្សាហ៍គឺគ្រាន់បើជាងដើរសុីឈ្នួលគេផង៕ សម្រួលដោយ ទៀង បុណ្ណរី
