ក្រុងបាត់ដំបង បើកពិធីប្រកួតអុំទូក តំបន់កម្សាន្តពីរជាគោលដៅទាក់ទាញអ្នកទេសចរ
ខេត្តបាត់ដំបង បានត្រៀមខ្លួនរួចជាស្រេចសម្រាប់ស្វាគមន៍ភ្ញៀវទេសចរ ក្នុងថ្ងៃបុណ្យអុំទូកមកដល់នាថ្ងៃទី ២៨-២៩ តុលា ស្អែកនេះ។
ការរៀបចំសម្រាប់ថ្ងៃបុណ្យប្រពៃណីជាតិឆ្នាំនេះ គេសង្កេតឃើញទីតាំងសំខាន់ៗ ២ គោលដៅដែលរំពឹងនឹងទាក់ទាញអ្នកដើរកម្សាន្តច្រើនក្នុងនោះគោលដៅទី ១ នៅប៉ែកខាងលិចនៃដងស្ទឹងសង្កែដែលមានវិមានឯករាជ្យ ទើបតែសាងសង់រួចជាមេដែកឆក់ដ៏សំខាន់មួយ រីឯគោលដៅទី ២ នៅប៉ែកខាងកើតប្របមាត់ស្ទឹងសង្កែ ដែលមានសម្រស់សួនច្បារសម្តេចក្រឡាហោម រួមមានតូបលក់សម្ភារជាហូរហែ ជាមួយសម្ភារនិងម្ហូបខ្មែរគ្រប់ប្រភេទដែលជាមេដែកឆក់ទី ២ សម្រាប់ឆក់យកកំណើនភ្ញៀវក្នុងនិងក្រៅស្រុក ដើរកម្សាន្តនឹងទិញសម្ភារជាអនុស្សាវរីយ៍ នឹងបរិភោគចំណីអាហារដែលជាស្នាដៃខ្មែរ តាមចិត្តដែលភ្ញៀវត្រូវការទៅតាមតម្រូវការដោយគ្មានការខ្វះខាត។គោលដៅទាំង ២ ខាងលើនេះ ក្រោយពីរៀបចំរួចគេសង្កេតឃើញមានមនុស្សម្នាជាច្រើនមកកម្សាន្តទាំងមុនថ្ងៃបុណ្យជាតិចូលមកដល់នាថ្ងៃទី ២៨-២៩ ខែតុលា ពិសេសនៅពេលរាត្រី។ ទិដ្ឋភាពដែលបានរៀបចំក្នុងឆ្នាំនេះទាំងមន្ត្រីនៃមន្ទីរជំនាញ និងមន្ត្រីរដ្ឋបាលខេត្តបានប្រាប់ថា មានសភាពអធិកអធមខណះថ្ងៃបុណ្យមិនទាន់ដល់ផងមនុស្សម្នាក្មេងចាស់ប្រុសស្រី សម្រុកមកលេងកម្សាន្តយ៉ាងច្រើនបង្ហាញយ៉ាងច្បាស់ថា ពិធីបុណ្យអុំទូកឆ្នាំនេះប្រាកដជាមានកំណើនភ្ញៀវច្រើនណាស់មកទស្សាកម្សាន្ត ជាពិសេសគយគន់ វិមានឯករាជ្យ ដែលបង្ហាញខ្លួនយ៉ាងស្រស់បំព្រងនៅពេលរាត្រី។ មន្ត្រីដដែលបន្តថា ដើម្បីលើកកម្ពស់សន្តិសុខទូទៅ ក៏ដូចជាគាំទ្រទៅដល់ពិធីបុណ្យអុំទូក និងបណ្តែតប្រទីបខេត្តបាត់ដំបង ឆ្នាំ២០២៣ នាថ្ងៃទី ២៨-២៩ ខែតុលា ឆ្នាំ២០២៣ គណៈបញ្ជាការឯកភាពរដ្ឋបាលខេត្ត បានដាក់បទបញ្ជាឱ្យសមត្ថកិច្ចដាក់ប៉ុស្តិ៍ត្រួតពិនិត្យអាវុធជាតិផ្ទុះ បទល្មើសគ្រឿងញៀន និងបទល្មើសផ្សេងៗទាំងយប់និងថ្ងៃដើម្បីរក្សាសន្តិសុខ សណ្តាប់ធ្នាប់ជូនប្រជាពលរដ្ឋក៏ដូចជាភ្ញៀវមកកម្សាន្តប្រកបដោយសុវត្ថិភាពគ្រប់ៗគ្នា។
ពលរដ្ឋដែលបានមកកម្សាន្តមុនថ្ងៃបុណ្យឯណេះវិញបានលើកឡើងថា បានមើលឃើញពីភាពរីកចម្រើននៃការអភិវឌ្ឍក្នុងខេត្ត។ ក្នុងចំណោមនោះលោកស្រី ចាន់នី បានប្រាប់ថា លោកស្រីរំភើបចិត្តពេលមកអង្គុយបរិវេណវិមានឯករាជ្យមានអារម្មណ៍ថា លោកស្រីនិងក្រុមគ្រួសារដូចកំពុងអង្គុយនៅមុខវិមានឯករាជ្យ នៅរាជធានីភ្នំពេញអីចឹងដែរ។ លោកស្រីបន្តថា “ខ្ញុំគិតថាឆ្នាំនេះគឺមានភ្ញៀវមកកម្សាន្តច្រើនជាងឆ្នាំមុន ដូចលោកមន្ត្រីលើកឡើងដែរ ព្រោះខ្ញុំមើលឃើញ ហើយចេះតែនឹកក្នុងចិត្តថា បច្ចុប្បន្នប្រទេសជាតិមានការរីកចម្រើន ជាពិសេសកន្លែងដើរលេងមានការរៀបចំបានល្អមិនចាញ់ប្រទេសជិតខាងប៉ុន្មាននោះទេ”៕
