ទើបនឹងរកឃើញជាង២ពាន់គ្រាប់នៅខេត្តក្រចេះ ពេលនេះប្រទះឃើញគ្រាប់មិនទាន់ផ្ទុះជិត៥០គ្រាប់ នៅសង្កាត់អូរចារ ខេត្តបាត់ដំបង

ខេត្តបាត់ដំបង៖ គ្រាប់យុទ្ធភ័ណ្ឌមិនទាន់ផ្ទុះចំនួន៤៩គ្រាប់ ត្រូវបានប្រទះឃើញក្នុងពេលក្រុមការងារនៃរដ្ឋបាលសង្កាត់អូរចារ ដាក់គ្រឿងចក្រកាយរៀបចំប្រព័ន្ធលូ និងធ្វើផ្លូវជូនប្រជាពលរដ្ឋប្រើប្រាស់នៅចំណុចក្រុមទី២១ ភូមិអញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង កាលពីថ្ងៃទី៣កញ្ញា ឆ្នាំ២០២៣…។   ប្រភពពីសមត្ថកិច្ចបានឱ្យដឹងថា ការប្រទះឃើញគ្រាប់ដែលសេសសល់ពីសម័យសង្គ្រាម មិនទាន់ផ្ទុះទាំងនេះ គឺបន្ទាប់ពីក្រុមហ៊ុន លឿង ជ័រ បានដាក់គ្រឿងចក្រចុះកាយរៀបចំដាក់ប្រព័ន្ធលូ និងបើកផ្លូវជូនប្រជាពលរដ្ឋនៅក្នុងភូមិសាស្ត្រា សង្កាត់អូចារ ហើយគ្រាប់ទាំង៤៩គ្រាប់នេះ ត្រូវបានប្រទះឃើញជាបន្តបន្ទាប់ ចាប់តាំងពីថ្ងៃទី២កញ្ញារហូតមក។ ប្រភពបន្តថា គ្រាប់ទាំង៤៩គ្រាប់ដែលប្រទះឃើញរួមមាន៖ ប្រភេទក្បាលគ្រាប់រ៉ូកែត, ក្បាលគ្រាប់១៣០ , ក្បាលគ្រាប់DK៧៥ , ក្បាលគ្រាប់៨៥ , ក្បាលគ្រាប់ផ្លោង១០៥ , និងប្រភេទក្បាលបំបែក១០៥។  គួរបញ្ជាក់ថា ក្រោយប្រទះឃើញអាជ្ញាធរបានប្រគល់ឱ្យមន្ត្រីជំនាញស៊ីម៉ាក់យកទៅរក្សាទុក និងផ្អាកក្រុមការងារជាងបណ្តោះអាសន្ន ដើម្បីរង់ចាំកម្លាំងស៊ីម៉ាក់មកពិនិត្យរាវរកគ្រាប់ដែលនៅសេសសល់ជាបន្តទៀតនាថ្ងៃបន្តបន្ទាប់..៕   សម្រួលដោយ  ទៀង  បុណ្ណរី