ចរាចរណ៍រថយន្ដដឹកស៊ីទែនហ្គាសបុករះរថយន្ដពីរគ្រឿងនៅចំណោទយាយម៉ៅពេជ្រនិល
រថយន្ដដឹកស៊ីទែនហ្គាសមួយគ្រឿងបានបើកបុករះរថយន្ដសណ្ដោង និងរថយន្ដទេសចរណ៍ក្នុងទិសដៅបញ្ច្រាសគ្នាបណ្ដាលឲ្យមនុស្សម្នាក់ស្លាប់នៅកន្លែងកើតហេតុ និងរបួសមួយចំនួន។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១និង៣០នាទី នៅចំណុចចំណោទពេជ្រនិល ចន្លោះគីឡូម៉ែត្រ ១០៣-១០៤ ភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្ដកំពង់ស្ពឺ។ តាមរបាយការណ៍របស់ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា ករណីនេះបង្កឡើងដោយរថយន្ដដឹកស៊ីទែនហ្គាស ម៉ាកSHACMAN ពណ៌ស ពាក់ស្លាកលេខភ្នំពេញ3G-1758 សណ្តោងរ៉ឺម៉ក់ ពណ៌ស ពាក់ស្លាកលេខភ្នំពេញ 4B-0249 អ្នកបើកបរមិនស្គាល់អត្តសញ្ញាណ(ចុះរត់គេចខ្លួនបាត់)។ បើតាមរបាយការណ៍រថយន្ដខាងលើបានបុករថយន្ដម៉ាកហ៉ីយ៉ាន់ដាយ ពណ៌លឿង ពាក់ស្លាកលេខភ្នំពេញ3C-3445 សណ្តោងរ៉ឺម៉ក់ ពណ៌លឿង ពាក់ស្លាកលេខភ្នំពេញ 4A-1424 រួចបន្តទៅបុករថយន្ត០១គ្រឿងទៀត ម៉ាកFORD TRANST ពណ៌ខៀវ ពាក់ស្លាកលេខភ្នំពេញ3F-5325 ដែលកំពុងបើកបរបញ្រ្ចាសទិសគ្នា។ ក្នុងហេតុការណ៍គ្រោះថ្នាក់ចរាចរណ៍នេះសមត្ថកិច្ចបញ្ជាក់ថា មានជនរងគ្រោះម្នាក់ ភេទប្រុសបានបាត់បង់ជីវិតនៅកន្លែងកើតហេតុ និងរបួសស្រាលធ្ងន់ ស្រាល មួយចំនួន។ កម្លាំងនគរបាលស្រុកភ្នំស្រួច បាននិងកំពុងសម្រួលចរាចរណ៍នៅកន្លែងកើតហេតុ ដើម្បីជៀសវាងបង្កឲ្យមានការកកស្ទះចរាចរណ៍៕ សម្រួលដោយ ទៀង បុណ្ណរី
