ម្ចាស់ផ្ទះមានទឹកចិត្តដ៏កម្ររក! សម្រេចប្រគល់លុយកក់ ២ ម៉ឺនដុល្លារជូនវិញ បន្ទាប់១ខែក្រោយ អ្នកទិញអត់មានលុយបង់បង្រ្គប់ ដោយសារតែ…
ពាក្យចាស់លោកពោលថា លុយពិតជាពិបាករកណាស់ ប៉ុន្តែមនុស្សល្អ គឺពិបាករកជាងលុយទៅទៀត។ យ៉ាងណាមិញ ថ្មីៗនេះ មហាជននៅលើបណ្តាញសង្គម បានផ្ទុះការចាប់អារម្មណ៍ និងសម្តែងការកោតសរសើរជាខ្លាំង នៅពេលបានឃើញម្ចាស់ផ្ទះចិត្តល្អម្នាក់ (ពុំមានសេចក្តីលោភលន់ចង់បាន) បានសម្រេចប្រគល់លុយកក់ចំនួន ២ ម៉ឺនដុល្លារ ដល់អ្នកទិញផ្ទះរបស់គាត់វិញ នៅពេលដឹងថា អ្នកទិញត្រូវជួបទុក្ខគ្រួសារមានអ្នកឈឺធ្ងន់ ដែលជាហេតុមិនអាចមានលុយបង់បង្គ្រប់បាន។ នេះបើតាមគណនីហ្វេសប៊ុកឈ្មោះ Kimhang Van ដែលជាម្ចាស់ផ្ទះ បានបង្ហោះឲ្យដឹងយ៉ាងដូច្នេះថា៖ «ថ្ងៃនេះខ្ញុំបានធ្វើរឿងមួយ ខែមុនគេទិញផ្ទះខ្ញុំកក់ 2 ម៉ឺនដុល្លារ បានមួយខែកន្លងមកគាត់ថាគាត់ឈឺ អត់មានលុយបង់បង្គ្រប់ ខ្ញុំក៏សម្រេចចិត្តប្រគល់លុយ កក់ 2 ម៉ឺនដុល្លារថ្លៃកក់ឲ្យគាត់វិញ នេះហើយជាគុណធម៌សម្រាប់ខ្ញុំ បើមិនមែនជាលុយត្រជាក់ត្រជុំ ដាច់ខាតខ្ញុំមិនចង់បានឡើយ អ្នកខ្លះគិតថាខ្ញុំល្ងង់ ខ្ញុំគិតថានេះជាគុណធម៌របស់មនុស្សល្អ។ ធ្វើល្អបានល្អ ថ្ងៃទី11ខែ8.2023»។ ក្រោយឃើញទឹកចិត្តដ៏ល្អបែបនេះ បងប្អូនអ្នកប្រើប្រាស់បណ្តាញសង្គម បានលើកសរសើរព្រោងព្រាតថា៖ «គួរឲ្យគោរពខ្លាំងណាស់! ពិបាករកណាស់ មនុស្សមិនចេះចង់បានរបស់គេដូចគាត់ បើអ្នកខ្លះវិញបែបមិនឱ្យទេមើលទៅ, ទឹកចិត្តនេះធំធេងដូចបានធ្វើបុណ្យ៧វត្តអញ្ចឹង បងប្រុសនឹងបានជួបតែរឿងល្អៗ ជោគជ៏យនៅក្នុងជីវិតជារៀងរហូត,…»។ជាមួយគ្នានេះផងដែរ ក៏មានអ្នកលេងបណ្តាញសង្គមដទៃ បានចែករំលែកឲ្យដឹងនូវទង្វើដ៏ល្អដូចគ្នានេះផងដែរថា «កាលគ្រួសារខ្ញុំលក់ដីដែលពុកខ្ញុំបានទិញទុកលក់យកចំណេញវិញក៌ចឹងដែរ ពូម្នាក់គាត់កក់លុយ២ពាន់$$ រួចហើយក៌ដាច់លុយកក់ គាត់ក៌និយាយថា គាត់សារេលុយអត់ទាន់ទេ ព្រោះកូនគាត់ឈឺត្រូវការលុយច្រើន ហើយម្តាយឪពុកខ្ញុំក៌អោយលុយកក់នោះទៅគាត់វិញ ពេលនោះគាត់លើកដៃសំពះម៉ែពុកខ្ញុំ»។ តែក្នុងនោះក៏មានអ្នកដែលធ្លាប់ជួបបទពិសោធន៍ «ឲ្យលុយគេចាយទទេ» បានចែករំលែកឲ្យដឹងដែរថា៖ «ចេញទិញផ្ទះលើកដំបូងអោយគេ6000$ចាយទទេ ដោយសារកូវីតទើបសម្រេចចិត្តឈប់ទិញ ខំដើរតួកំសត់សុំលុយគេមកវិញ តែគេមិនអោយ អត់ខឹងគេទេ ព្រោះជាកំហុសយើង ដោយសារយើងគ្មានបុណ្យទើបជួបមនុស្សគ្មានចិត្តធម៌ តាំងពីនោះមកខំធ្វើល្អដើម្បីបានជួបមនុស្សល្អៗដូចនេះ»៕ សម្រួលដោយ ទៀង បុណ្ណរី
