អនិច្ចាសង្ខាមិនទៀង! ជិតដល់ថ្ងៃចូលរោងការទៅហើយ ជិះម៉ូតូឆ្លងផ្លូវ បណ្ដាលឲ្យជួបគ្រោះថ្នាក់ចរាចរណ៍ស្លា.ប់ ចោលនារីជាគូរដណ្តឹងឲ្យនៅឯកា

ភ្នំពេញ ៖ យុវជនម្នាក់បានស្លា.ប់ភ្លាមៗ ចំណែកបុរសម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ រវាងម៉ូតូពីគ្រឿងបានបុកគ្នាយ៉ាងពេញទំហឹង ។ ដោយហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង ៧:០០ នាទីព្រឹកថ្ងៃទី៣០ ខែមិថុនា ឆ្នាំ២០២៣ ស្ថិតនៅចំណុចច្រកចូលផ្លូវល្បឿន តាមបណ្តោយមហាវិថីឈ្នះឈ្នះ  សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។សពយុវជនរងគ្រោះខាងលើនេះមានឈ្មោះ ទាំ សុះរី ភេទប្រុស អាយុ២០ឆ្នាំ មុខរបរព្រូរថយន្តស្ទូចកុងតឺន័រ មានស្រុកកំណើតនៅ ភូមិផ្ទះចេក ឃុំឈើតុំ ស្រុកក្រគរ ខេត្តពោធិ៍សាត់។  បើយោងតាមសម្ដី ពីនារីដែលជាគូដណ្ដឹងជនបានឲ្យដឹងថា មុនពេលកើតហេតុយុវជនខាងលើបានជិះម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅពាក់ផ្លាកលេខពោធិ៍សាត់1H-4919  ចេញពីផែកុងតឺន័រ មករកទិញបាយនិងទឹកកកយកទៅហូប ខណៈដែលទិញបាយនិងទឹកកករួចរាល់ហើយនោះ រូបគេក៏បានជិះម៉ូតូត្រឡប់មកវិញឆ្លងផ្លូវ ពីកើតមកលិច ហើយក៏បានជិះបញ្ច្រាសផ្លូវពីជើងទៅត្បូង ស្របពេលនោះក៏មានបុរសម្នាក់ ជិះម៉ូតូមួយគ្រឿងម៉ាកហុងដាសេ១២៥ ពណ៌ខ្មៅពាក់ផ្លាកលេខព្រៃវែង1W- 1410  ក្នុងល្បឿនយ៉ាងលឿន ដោយធ្វើដំណើរពីទិសដៅពីត្បូងទៅជើង បានបុកយុវជនដែលជិះម៉ូតូបញ្ច្រាសទិសយ៉ាងពេញទំហឹង បណ្ដាលឲ្យស្លា.ប់ភ្លាមៗនៅកន្លែងកើត ចំណែកម្ចាស់ម៉ូតូមួយគ្រឿងទៀត រងរបួសធ្ងន់ត្រូវបានបញ្ជូនទៅកាន់មន្ទីរពេទ្យ ដើម្បីធ្វើការសង្គ្រោះភ្លាមៗ។  ក្រោយពេលកើតហេតុកម្លាំងប៉ុស្តិ៍នគរបាលរដ្ឋបាលសង្កាត់សំរោងក្រោម សហការជាមួយនឹងកម្លាំងជំនាញនគរបាលខណ្ឌពោធិ៍សែនជ័យ និងកម្លាំងការិយាល័យចរាចរណ៍ចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ បានចុះមកដល់ទីតាំងកើតហេតុខាងលើ ដើម្បីធ្វើការវាស់វែង និងបានយកម៉ូតូទាំងពីរគ្រឿង ទៅរក្សាទុកដើម្បីដោះស្រាយគ្នានៅពេលក្រោយ។  ចំណែកសពជនរងគ្រោះខាងលើ សមត្ថកិច្ចបានធ្វើកំណត់ប្រគលទៅឲ្យក្រុមគ្រួសារ សាច់ញាតិដឹកយកទៅធ្វើបុណ្យតាមប្រពៃណី នៅស្រុកកំណើតឯខេត្តពោធិ៍សាត់៕   សម្រួលដោយ  ទៀង  បុណ្ណរី