គ្រោះថ្នាដ៏រន្ធត់មនុស្ស១៤នាក់រងរបួសធ្ងន់ស្រាល ក្នុងហេតុការណ៍រថយន្តដឹកអ្នកដំណើរគ្រោះថ្នាក់ចរាចរណ៍នៅខេត្តសៀមរាប

ខេត្តសៀមរាប៖ រថយន្តប្រភេទដឹកអ្នកដំណើរ៤៥កៅអីមួយគ្រឿង បានរេចង្កូតធ្លាក់ពីលើផ្លូវបណ្ដាលឱ្យក្រឡាប់ ដោយសារអ្នកបើកបរងងុយដេកបណ្តាលឱ្យមនុស្ស៣នាក់រងរបួសធ្ងន់ និង១១នាក់រងរបួសស្រាល។ ហេតុការណ៍ដ៏រន្ធត់ នេះបានកើតឡើងនៅចំណុច ផ្លូវជាតិលេខ៦ ចន្លោះបង្គោលគីឡូម៉ែត្រលេខ ៣៤០-៣៤១ ស្ថិតក្នុងភូមិប៉ាក់ប៉ាន់ ឃុំសសរស្តម្ភ  ស្រុកពួក ខេត្តសៀមរាប កាលថ្ងៃទី១៨ ខែមិថុនា ឆ្នាំ២០២៣។ ប្រភពពីសមត្ថកិច្ចបានឱ្យដឹងថា នៅវេលាម៉ោង៤:១០នាទីថ្ងៃកើតហេតុ មានរថយន្ថមួយគ្រឿងប្រភេទដឹកភ្ញៀវ៤៥កៅអី ពាក់ស្លាកលេខ ភ្នំពេញ ៣B-៤៩៩៩ ពណ៌លឿងមួយគ្រឿង​ បើកបរក្នុងទិសដៅពីកើតទៅលិចលុះដល់ចំណុចកើតហេតុ ក៏បានរ៉េចង្កូតធ្លាក់ផ្លូវក្រឡាប់ចូលវាលស្រែបណ្តាលឱ្យមនុស្សរបួសធ្ងន់ចំនួន ០៣នាក់ និងស្រាល ១១នាក់ ក្នុងនោះមានជនជាតិអាល្លឺម៉ង់ ០១នាក់ និងជនជាតិឥណ្ឌា ០២នាក់។ បន្ថែមលើសនេះសមត្ថកិច្ចបន្តថា ចំពោះមូលដែលបង្កឱ្យមានគ្រោះថ្នាក់ខាងលើនេះកើតឡើង​ គឺដោយសារអ្នកបើករថយន្តងងុយដេក។ បច្ចុប្បន្នកម្លាំងជំនាញពុំទាន់កំណត់បានអត្តសញ្ញាណអ្នកបើកបរនៅឡើយនោះទេដោយភ្លាមៗក្រោយកើតហេតុបានរត់គេចខ្លួនបាត់ បន្សល់ទុកតែរថយន្តដែលក្រឡាប់រួមជាមួយអ្នកដំណើរនៅកន្លែងកើតហេតុ។ គួរបញ្ជាក់ដែរថា ក្រោយកើតហេតុភ្លាមៗកម្លាំងនគរបាលជំនាញបានចុះដល់កន្លែងកើតហេតុធ្វើការវាស់វែង ប្រមូលវត្ថុតាងពាក់ព័ន្ធយកទៅរក្សាទុកនៅអធិការដ្ឋាននគរបាលស្រុកពួក ដើម្បីដោះស្រាយតាមនីតិវិធីច្បាប់៕    សម្រួលដោយ  ទៀង  បុណ្ណរី