ខឹងប្ដីមានស្រីមិនគិតប្រពន្ធកូន ទាញកាំភ្លើងបាញ់សម្លាប់ខ្លួនឯងទាំងព្រឹក
ភ្នំពេញ៖ ដោយសារតែកើតភ្លើងប្រច័ណ្ឌប្ដីមានស្រីមិនគិតគូរប្រពន្ធកូន ស្ត្រីម្នាក់បានទាញកាំភ្លើងរបស់ប្ដីបាញ់ក្បាលខ្លួនឯងមួយគ្រាប់បណ្ដាលឱ្យស្លាប់ភ្លាមៗ។ ហេតុការណ៍នេះបង្កការភ្ញាក់ផ្អើលកាលពីវេលាម៉ោង ៦:៣០នាទីព្រឹក ថ្ងៃទី២៩ ខែឧសភា ឆ្នាំ ២០២៣ ស្ថិតនៅចំណុចផ្ទះលេខ១១ ផ្លូវបេតុង ភូមិក្រាំងដូនទៃ សង្កាត់ចោមចៅទី ២ ខណ្ឌពោធិ៍សែនជ័យ។ ស្ត្រីរងគ្រោះឈ្មោះ ឡុង ចាន់នី ភេទស្រី អាយុ ៤០ ឆ្នាំ មុខរបរមេផ្ទះ។ ចំណែកប្ដីជនរងគ្រោះឈ្មោះ យ៉ែម ប៊ុនធឿន អាយុ ៤៦ ឆ្នាំ មុខរបរមន្ត្រីនគរបាលព្រហ្មទណ្ឌ នៅក្រសួងមហាផ្ទៃ។ ប្រភពពីកូនស្រីជនរងគ្រោះបានឱ្យដឹងថា កាលពីថ្ងៃទី២៨ ខែឧសភា ឆ្នាំ២០២៣ ម្ដាយបានមកពីពិធីបុណ្យជាមួយនឹងឪពុករបស់ខ្លួន។ បន្ទាប់មកម្ដាយបាននិយាយផ្តែផ្តាំថា ឱ្យនាងជួយមើលថែប្អូនៗផង ប៉ុន្តែនាងមិនចាប់អារម្មណ៍ ក៏នាំគ្នាឡើងសម្រាករៀងៗខ្លួនអស់ទៅ។ លុះដល់ព្រឹកឡើងនៅម៉ោងកើតហេតុ ស្រាប់តែឮសំឡេងដូចរន្ទះបាញ់ ហើយឪពុករបស់នាង បានស្រែកថា «ម៉ាក់បាញ់ខ្លួនឯងស្លាប់បាត់ហើយកូន»។ ក្នុងនោះ នាងឃើញឪពុកយកកាំភ្លើងដកគ្រាប់ចេញ។ ប្រភពដដែលបានបន្តថា នេះមិនមែនជាលើកទី១ដែលស្ត្រីរូបនេះព្យាយាមសម្លាប់ខ្លួនឯងនោះទេ កន្លងមកជនរងគ្រោះតែងតែប៉ុនប៉ងសម្លាប់ខ្លួនឯងជាច្រើនដង តែមិនបានសម្រេច ដោយប្ដីឃើញទាន់ ជួនកាលអ្នកជួលបន្ទប់ជួលជួយទាន់(ពេលរកចង.កសម្លាប់ខ្លួន)។ ចំពោះមូលហេតុវិញ គឺដោយសារតែប្រពន្ធប្រច័ណ្ឌប្ដីមានស្រី។ ក្រោយកើតហេតុ សមត្ថកិច្ចមូលដ្ឋានបានចុះទៅដល់ចំណុចកើតហេតុហ៊ុមព័ទ្ធធ្វើកោសល្យវិច័យជាក់ស្ដែង៕ សម្រួលដោយ ទៀង បុណ្ណរី
