ផ្អើលពេញក្រុងព្រះសីហនុ រថយន្តទំនើបមួយគ្រឿងបើកសុខៗ លេចចេញអណ្តាតភ្លើងឆេះខ្ទេចលើទ្រូងផ្លូវ

ខេត្តព្រះសីហនុ៖ រថយន្តទំនើបម៉ាក Range Rover មួយគ្រឿង ត្រូវបានឆេះខ្ទេចហ្មត់សល់ត្រឹមតែគ្រោងឆ្អឹង ខណៈករណីដ៏គួរឱ្យភ្ញាក់ផ្អើលនេះ កើតឡើង​កាលពីវេលាម៉ោង១២:២០នាទីរំលងអាធ្រាត្រថ្ងៃទី១៨ ខែឧសភា ឆ្នាំ២០២៣ តាមបណ្ដោយផ្លូវអូរ៥ ឆ្ពោះ​ទៅអូរឈើទាលត្រង់ផ្លូវបំបែកជាបីទៅអូត្រេះ ស្ថិតនៅក្នុងក្រុម១ ភូមិ៦ សង្កាត់លេខ៤ ក្រុងព្រះសីហនុ​​…។ យោងតាមប្រភពនៅកន្លែងកើតហេតុ បានឱ្យដឹងថា បន្ទាប់ពីគាត់បើករថយន្តឆ្លងកាត់ផ្លូវនោះ បានឃើញ​រថយន្តម៉ាក range Rover ពណ៌ស ពាក់ស្លាកលេខភ្នំពេញ ២BB-៣៧៨៧ ស៊េរីឆ្នាំ២០១៥ បើកបរមកពីទិសដៅអូត្រេះជិតផ្លូវបត់កែងបំបែកជាបី ស្រាប់តែឃើញរថយន្តនោះហុយផ្សែងបន្តិចម្ដងៗនៅខាងមុខចំហៀងខាងឆ្វេង តែគាត់មិនបានឈប់ក៏បើកបរហួសទៅព្រោះជាប់ដឹកភ្ញៀវ។ ប្រភពដដែលបន្តថា ក្រោយពីគាត់ត្រឡប់មកវិញក៏ឃើញមានកម្លាំងស្នងការនគរបាលខេត្ត​ និងកម្លាំងអាវុធហត្ថប៉េអឹមខេត្ត ចុះជួយអន្តរាគមន៍ពន្លត់ភ្លើងដែលកំពុងឆាបឆេះលើរថយន្តទំនើបនោះទៅហើយ និងបានបង្កការភ្ញាក់ផ្អើលដល់មនុស្សមានម្នាក្បែរនោះតែម្ដង។  ដោយឡែក សមត្ថកិច្ចនគរបាលនៃស្នងការខេត្តព្រះសីហនុ បានឱ្យដឹងថា ការចុះអន្តរាគមន៍ជួយពន្លត់អគ្គិភ័យឆេះរថយន្តនេះ បានប្រើប្រាស់រថយន្តពន្លត់អគ្គិភ័យស្នងការនគរបាលខេត្តព្រះសីហនុ អស់ទឹកចំនួន០២គ្រឿង និងរថយន្តពន្លត់អគ្គិភ័យប៉េអឹមខេត្តព្រះសីហនុ អស់០១គ្រឿងផងដែរ។ សមត្ថកិច្ចបន្តថា ​តាមការស្រាវជ្រាវសួរនាំរបស់កម្លាំងនគរបាលស្នងការខេត្តព្រះសីហនុ ដើម្បីស្វែងរកម្ចាស់រថយន្ត ក៏បានជួបអ្នកបកប្រែភាសាចិនម្នាក់ គាត់ក៏បានណែនាំប្រាប់កម្លាំងសមត្ថកិច្ចថា រថយន្តម៉ាក Range Rover ខាងលើបើកបរដោយជនជាតិចិនបានជួលពីម្ចាស់ជាជនជាតិខ្មែរ ឈ្មោះ ផន សុភា នៅរាជធានីភ្នំពេញ។ សមត្ថកិច្ចបន្ថែមទៀតថា ចំពោះមូលហេតុឆេះនេះ មកពីឆ្លងចរន្តខ្សែភ្លើងនៅខាងក្រោមរថយន្តទើបបណ្ដាលឱ្យឆេះតែម្ដង៕    សម្រួលដោយ  ទៀង  បុណ្ណរី