ករណីស្លា.ប់កុមារី លួត លីហ្សា នៅក្រុងប៉ោយប៉ែត អាជ្ញាធរឈានដល់ការឃាត់ខ្លួនសាច់ញាតិមួយគ្រួសារយកទៅសាកសួរ
ខេត្តបន្ទាយមានជ័យ៖ យោងតាមសេចក្តីរាយការណ៍ពីភ្នាក់ងារ TNM ប្រចាំខេត្តបន្ទាយមានជ័យ នៅរសៀលថ្ងៃចន្ទទី១ ខែឧសភា ឆ្នាំ២០២៣នេះ បានឱ្យដឹងថា ករណីស្លាប់កុមារី លួត លីហ្សា ដែលសមត្ថកិច្ចខេត្តបន្ទាយមានជ័យអះអាងថា មិនមែនជារឿងឃាតកម្មនោះ ពេលនេះ អាជ្ញាធរឈានដល់ការឃាត់ខ្លួនមនុស្ស១គ្រួសារដែលមានសមាជិក៥នាក់យកទៅសាកសួរ…។ សូមរំឭកថា កុមារី លួត លីហ្សា អាយុ៧ឆ្នាំ ជាសិស្សសាលាបឋមសិក្សាទំនប់ក៥ បានស្លាប់អស់រយៈពេលជាងមួយឆ្នាំមកហើយ នៅមិនទាន់ទទួលបានភាពយុត្តិធម៌នោះទេ ខណៈដែលអាជ្ញាធរខេត្តបន្ទាយមានជ័យដឹកនាំដោយលោកឧត្តមសេនីយ៍ទោ សិទ្ធិ ឡោះ ជាស្នងការ បានឆ្លើយតបនឹងសំណួរអង្គភាពសារព័ត៌មាន TNM កាលពីថ្ងៃទី២៨ ខែមីនា ឆ្នាំ២០២៣ថា តាមរយៈការធ្វើកោសលវិច័យពីមន្ត្រីជំនាញជាតិ និងអន្តរជាតិ ចំពោះករណីខាងលើ មិនជាឃាតកម្មលើក្មេងស្រី លួត លីហ្សា នៅក្រុងប៉ោយប៉ែត នោះឡើយ ប៉ុន្តែជាករណីគ្រោះថ្នាក់ចរាចរណ៍ ដែលមកដល់ពេលនេះ អាជ្ញាធរកំពុងបន្តការស៊ើបអង្កេតករណីនេះនៅឡើយ។ ចំពោះសព កុមារី លួត លីហ្សា ដែលមានឪពុកឈ្មោះ សំ សាន្ត អាយុ៣៣ឆ្នាំ (កម្មករផ្សាររ៉ុងក្លឿង) និងម្តាយឈ្មោះ យាន ខេមរា អាយុ៣២ឆ្នាំ ជាមេគ្រួសារ រស់នៅភូមិទំនប់ក៥ សង្កាត់ប៉ោយបែត ក្រុងប៉ោយប៉ែត នោះ នៅតែដង្ហោយហៅរកយុត្តិធម៌ពីសំណាក់អាជ្ញាធរ។ ក្រោយធ្វើការស្រាវជ្រាវ កាលពីថ្ងៃទី២៧ ខែមេសា ឆ្នាំ២០២៣ កម្លាំងជំនាញបាននាំខ្លួនទាំងគ្រួសារដែលមានគ្នាចំនួន៥នាក់ ក្នុងនោះមានប្រុស៣នាក់ និងស្រី២នាក់ ដែលមានឪពុកជាប់ជាជនសង្ស័យ និងកូនប្រុសម្នាក់ និងកូនប្រសារប្រុសម្នាក់ និងស្ត្រី២នាក់ម្តាយ និងកូនស្រី ត្រូវបាននាំខ្លួនយកទៅសាកសួរនៅស្នងការដ្ឋាននគរបាលខេត្តបន្ទាយមានជ័យ ហើយផ្ទះរបស់ជនជាប់ចោទ ត្រូវបានចាក់សោបិទទ្វារ ដោយឱ្យប្រជាការពារភូមិយាមកាម។ លោកឧត្តមសេនីយ៍ត្រី នូរ ជីវ័ន្ត ស្នងការរងទទួលផែនព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបន្ទាយមានជ័យ បានថ្លែងឱ្យដឹងថា ករណីកុមារី លួត លីហ្សា អាយុ៧ឆ្នាំ ដែលបានស្លាប់អស់រយៈពេលជាង១ឆ្នាំមកនោះ ពេលនេះក្រោមការដឹកនាំផ្ទាល់ពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត បានគាស់កកាយបើកសំណុំរឿងសម្ងាត់មួយនេះហើយ ប៉ុន្តែចំពោះរឿងហេតុយ៉ាងណានោះអាជ្ញាធរ នឹងផ្តល់ព័ត៌មានក្រោយការសាកសួរពីមន្ត្រីជំនាញរួចរាល់ ទើបផ្តល់ជូនព័ត៌មានលម្អិតជាផ្លូវការ៕ សម្រួលដោយ ទៀង បុណ្ណរី
