ទំនិញក្នុងផ្សារទួលទំពូង មិនមានការឡើងថ្លៃទេ មុនពេលពិធីបុណ្យចូលឆ្នាំខ្មែរ
បច្ចុប្បន្ន ភ្ញៀវទេសចរចេញចូលផ្សារទួលទំពូង ក្នុងមួយថ្ងៃប្រមាណជា ២០០ ទៅ ៣០០ នាក់ ខណៈមុខទំនិញក្នុងផ្សារ មិនមានការដំឡើងថ្លៃនោះទេ។ នេះបើយោងតាមការឲ្យដឹងពីលោកប្រធានគណៈកម្មការផ្សារទួលទំពូង។ លោក ចំរើន សុខលីម ប្រធានគណៈកម្មការផ្សារទួលទំពូង បានមានប្រសាសន៍ប្រាប់ «កម្ពុជាថ្មី» នៅរសៀលថ្ងៃទី ០៦ ខែមេសា ឆ្នាំ ២០២៣ នេះថា សព្វថ្ងៃនេះ ផ្សារទួលទំពូង មានភ្ញៀវទេសចរចេញចូលទិញទំនិញច្រើនគួរសម ខណៈភ្ញៀវជាតិភាគច្រើនទិញសម្ភារៈ ពាក់ព័ន្ធនឹងពិធីបុណ្យចូលឆ្នាំប្រពៃណីជាតិខ្មែរ។ ជាមួយគ្នានេះ លោកបានឲ្យដឹងថា ក្នុងមួយថ្ងៃៗ មានភ្ញៀវទេសចរប្រមាណ ៣០០ នាក់ បានចេញ-ចូល និងទិញរបស់របរមួយចំនួន នៅក្នុងផ្សារទួលទំពូង។ លោក ចំរើន សុខលីម បានបញ្ជាក់ថា «ភ្ញៀវទេសចរចេញចូលផ្សារប្រហែល ២០០ នាក់ ទៅ ៣០០ នាក់ ក្នុងមួយថ្ងៃ។ បើខ្មែរយើងចូលផ្សារភាគច្រើនទិញសម្ភារៈពាក់ព័ន្ធនឹងពិធីបុណ្យចូលឆ្នាំខ្មែរ»។ ត្បិតកៀកការប្រារព្ធពិធីបុណ្យចូលឆ្នាំប្រពៃណីជាតិខ្មែរ សម្រាប់ទំនិញក្នុងផ្សារទួលទំពូង គ្មានការដំឡើងថ្លៃឡើយ ការលក់នៅដដែល។ នេះបើយោងតាម លោក ចំរើន សុខលីម ប្រធានគណៈកម្មការផ្សារទួលទំពូង បានបញ្ជាក់។ ផ្សារទួលទំពូង មានទីតាំងស្ថិតនៅរាជធានីភ្នំពេញ ដែលផ្សារនេះ មានលក់ម្ហូបអាហារ បន្លែ ត្រី សាច់ គ្រឿងទេស ឧបករណ៍ប្រើប្រាស់ សម្លៀកបំពាក់ និងវត្ថុអនុស្សាវរីយ៍ជាច្រើន៕ សម្រួលដោយ ទៀង បុណ្ណរី
