កម្ពុជា ដណ្តើមបានមេដាយសរុប ៣៣គ្រឿង ពីការប្រកួតកីឡាគុនល្បុក្កតោជ្រើសរើសជើងឯកអាស៊ីអាគ្នេយ៍ លើកទី១ ឆ្នាំ២០២៣
ភ្នំពេញ៖ ម្ចាស់ផ្ទះកម្ពុជា ទទួលបានភាពជោគជ័យយ៉ាងអស្ចារ្យ ដណ្តើមបានមេដាយច្រើនជាងគេ ដោយសរុបមានចំនួន ៣៣គ្រឿង ពីការប្រកួតកីឡាគុនល្បុក្កតោជ្រើសរើសជើងឯកអាស៊ីអាគ្នេយ៍ លើកទី១ ឆ្នាំ២០២៣ ដែលមាន ៤ប្រទេសចូលរួម។ បានបញ្ចប់ដោយជោគជ័យក្រោយឆ្លងកាត់ការប្រកួតរយៈពេល ៣ថ្ងៃ ចាប់តាំងពីថ្ងៃទី០១-០៣ ខែមេសា ឆ្នាំ២០២៣ ដែលធ្វើឡើងនៅវិទ្យាល័យភូមិន្ទភ្នំពេញ។ ស្ថិតក្នុងការប្រកួតកីឡាគុនល្បុក្កតោជ្រើសរើសជើងឯកអាស៊ីអាគ្នេយ៍ លើកទី១ ឆ្នាំ២០២៣ ម្ចាស់ផ្ទះកម្ពុជា ដណ្តើមបានមេដាយមាសច្រើនជាងគេដល់ទៅ ១១គ្រឿង ក្នុងនោះមានមេដាយប្រាក់ ១០គ្រឿង និងមេដាយសំរិទ្ធ ១២គ្រឿង។ ដែលការប្រកួតនេះមានការចូលរួមជាអាជ្ញាកណ្តាលកាត់សេចក្តីមកពីប្រទេសបារាំង អាមេរិក កូរ៉េ និងអ៊ឺរ៉ង់ ផងដែរ។ ស្ថិតក្នុងពិធីបិទការប្រកួត មានការអញ្ជើញចូលរួមពីឯកឧត្តមបណ្ឌិតសភាចារ្យ ច័ន្ទ សារុន ប្រធានសហព័ន្ធកីឡាគុនល្បុក្កតោកម្ពុជា រួមជាមួយឯកឧត្តម កែវ រ៉េមី អនុប្រធានសហព័ន្ធ និងប្រតិភូដឹកនាំកីឡាគុនល្បុក្កតោ ដែលមកពីតំបន់អាស៊ានរួមមាន វៀតណាម, ឡាវ, ហ្វីលីពីន, ថៃ, មីយ៉ាន់ម៉ា, ឥណ្ឌូនេស៊ី។ លោក ច័ន្ទ សារុន ប្រធានសហព័ន្ធ ប្រធានសហព័ន្ធកីឡាគុនល្បុក្កតោកម្ពុជា បានថ្លែងថា ក្រោយការបំពេញកិច្ចការងារដឹកនាំការប្រកួតយ៉ាងសកម្ម ក្រោមកិច្ចសហការយ៉ាងស្អិតល្មួតរបស់មន្ត្រីបច្ចេកទេសអន្តរជាតិរបស់យើង យើងអាចសន្និដ្ឋានបានថា ពន្លឺនៃភាពជោគជ័យ និងមាគ៌ាដ៏វែងអន្លាយរបស់កីឡាគុនល្បុក្កតោ នឹងឆ្ពោះទៅមុខ ដែលអាចចាក់គ្រឹះបាន នៅក្នុងកម្រិតអាស៊ាន និងបន្តទៅកម្រិតពិភពលោកនៅរយៈពេលខ្លីខាងមុខនេះ។ លោកបន្តថា ក្បាច់គុនល្បុក្កតោ មានប្រភពនៅក្នុងតំបន់អាស៊ីអាគ្នេយ៍ ដែលពេលនេះគុនល្បុក្កតោ គឺជាកម្មសិទ្ធិរួមមួយរបស់មនុស្សជាតិលើពិភពលោក ដែលបានចុះបញ្ជីជាសម្បត្តិបេតិកភណ្ឌអរូបិយ នៃមនុស្សជាតិ កាលពីពេលកន្លងទៅ ក្នុងការបន្តនិរន្តរភាព នៃកីឡាដែលមានកំណើតពីអាស៊ីអាគ្នេយ៍មួយនេះអាចទៅមុខបាន គឺអ្វីដែលមិនអាចខ្វះបាននោះ គឺការចូលរួមរបស់បណ្តាប្រជាជាតិក្នុងតំបន់ និងជម្រុញបន្តទៅលើពិភពលោកទៀត។ ចំណុចខ្វះខាត គឺតែងតែកើតមានឡើងក្នុងការបំពេញកិច្ចការងារ តែក្នុងយុទ្ធសាស្ត្រក្នុងការបំពេញបន្ថែម និងកែតម្រូវក៏ជាកត្តាសំខាន់ដែលយើងទាំងអស់គ្នាត្រូវគិតគូរ។ លោកគូសបញ្ជាក់ថា ក្នុងនាមសហព័ន្ធកីឡាគុនល្បុក្កតោកម្ពុជា និងក្នុងនាមខ្លួនខ្ញុំផ្ទាល់ សូមបញ្ជាក់ថា នឹងទទួលយកនូវការប្រឹក្សា និងដាក់ចេញនូវយុទ្ធសាស្ត្របំពេញ និងកែសម្រួលចំណុចខ្វះខាតឲ្យខាងតែបាន។ បញ្ជាក់ផងថា ការប្រកួតកីឡាគុនល្បុក្កតោជ្រើសរើសជើងឯកអាស៊ីអាគ្នេយ៍ លើកទី១ ឆ្នាំ២០២៣ ដែលកម្ពុជាធ្វើម្ចាស់ផ្ទះ មានកីឡាករ-កីឡាការិនីជាង ១០០នាក់ ដែលមកពី ៤ប្រទេសចូលរួមមាន វៀតណាម, ឡាវ, ហ្វីលីពីន, និងកម្ពុជា ហើយជាលទ្ធផលម្ចាស់ផ្ទះកម្ពុជាឈរលេខ១ ដណ្តើមបានមេដាយច្រើនជាងគេសរុប ៣៣គ្រឿង មាស១១ ប្រាក់១០ និងសំរិទ្ធ១២គ្រឿង។ ហើយក្រុមអត្តពលិកឡាវ ឈរលេខ២ ដណ្តើមបានមេដាយសរុប ២៤គ្រឿង មាន មាស៥ ប្រាក់៧ និងសំរិទ្ធ ១២គ្រឿង, ក្រុមវៀតណាម ឈរលេខ៣ ដណ្តើមបានមេដាយមាស៣ ប្រាក់៣ និងសំរិទ្ធ ៣គ្រឿង សរុប ៩គ្រឿង, ខណៈហ្វីលីពីន ដណ្តើមមេដាយសរុប ៦គ្រឿង មាស២ ប្រាក់១ និងសំរិទ្ធ ៣គ្រឿងឈរលេខ៤៕ សម្រួលដោយ ទៀង បុណ្ណរី
