ឧត្តមសេនីយ៍ ឡុង សត្យា៖ សូមចូលរួមជួយចែករំលែកនូវសេចក្ដីស្រឡាញ់ដល់ក្រុមគ្រូពេទ្យជួរមុខឲ្យបានគ្រប់ៗគ្នានិងសូមចូលរួមទប់ស្កាត់ការពារជំងឺកូវិដ-១៩ គឺ ៣ការពារ ៣កុំ

TNM(កណ្តាល)៖ ឯកឧត្ដមឧត្ដមសេនីយ៍ ឡុង សត្យា សមាជិកក្រុមលេខាធិការសម្ដេចតេជោនាយករដ្ឋមន្ត្រីនៃកម្ពុជាបានថ្លែងថា យើងខ្ញុំពិតជាបានមើលឃើញជាក់ស្ដែងពីការការនឿយហត់ ការខិតខំប្រឹងប្រែង ការលះបង់ខ្ពស់ និងការយកចិត្តទុកដាក់របស់លោកគ្រូ អ្នកគ្រូ ដែលជាកងទ័ពអាវសជួរមុខដែលមានការប្រឈមខ្លាំងក្នុងការជួយព្យាបាលដល់អ្នកជំងឺកូវិដ-១៩ អាស្រ័យហេតុដូច្នេះហើយ សូមចូលរួមជួយចែករំលែកនូវសេចក្ដីស្រឡាញ់ដល់ក្រុមគ្រូពេទ្យជួរមុខឲ្យបានគ្រប់ៗគ្នានិងសូមចូលរួមទប់ស្កាត់ការពារជំងឺកូវិដ-១៩ ដោយអនុវត្តន៍តាមប្រសាសន៍ណែនាំរបស់សម្ដេចតេជោពុក ៣ការពារ ៣កុំ។

ការថ្លែងយ៉ាងដូច្នេះនៅក្នុងឱកាសដែល ឯកឧត្ដមឧត្ដមសេនីយ៍ និងក្រុមហ៊ុនសម្រស់ធម្មជាតិ នៅព្រឹកថ្ងៃទី២៤ ខែមិនា ឆ្នាំ២០២១នេះ បាននាំយកគ្រឿងឧបភោគបរិភោគទាំងពេលព្រឹកនិងថ្ងៃត្រង់ ទឹកបរិសុទ្ធ និងម៉ាស់ជាច្រើនប្រអប់ជូនដល់ក្រុមគ្រូពេទ្យជួរមុខនៅមន្ទីរពេទ្យបង្អែកចាក់អង្រែក្រោម និងមន្ទីរពេទ្យបង្អែកស្ទឹងមានជ័យ ស្ថិតនៅខណ្ឌមានជ័យ រាជធានីភ្នំពេញ។

ឯកឧត្ដមឧត្ដមសេនីយ៍បានឲ្យដឹងថា ដោយមានការចូលរួមពីក្រុមហ៊ុនសម្រស់ធម្មជាតិដើម្បីរួមចំណែកលើកទឹកចិត្ត និងសម្ដែងការអរគុណដោយស្មោះ និងចែករំលែកក្តីនឹករលឹក ក្ដីស្រឡាញ់ដល់លោកគ្រូ អ្នកគ្រូដែលបានអត់ធ្មត់ ព្យាយាម តស៊ូ ប្រឹងប្រែងចូលរួមយ៉ាងសកម្មក្នុងការជួយពិនិត្យព្យាបាលដល់ប្រជាពលរដ្ឋខ្មែរទាំងអ្នកវិជ្ជមានកូវិដ-១៩និងកំពុងធ្វើចត្តាឡីស័ក។

ជាមួយគ្នានោះ ក្រុមគ្រូពេទ្យជួរមុខក៏បានសម្ដែងនូវការអរគុណយ៉ាងជ្រាលជ្រៅចំពោះឯកឧត្ដមឧត្ដមសេនីយ៍សមាជិកក្រុមលេខាធិការសម្ដេចតេជោនាយករដ្ឋមន្ត្រីនៃកម្ពុជា និងក្រុមហ៊ុនសម្រស់ធម្មជាតិដែលបានចំណាយពេលវេលាដ៏មានតម្លៃនិងមមារញឹកមកសួរសុខទុក្ខ និងបាននាំយកទាំងអាហារនិងទឹកបរិសុទ្ធយ៉ាងច្រើនសន្ធឹកសន្ធាប់មកជូនពួកគាត់៕