រថយន្តបែនដឹកដីបុករថយន្តកុងទីន័រ ខណៈរថយន្តកុងទីន័រកំពុងបទចូលភូមិ

ភ្នំពេញ៖​ រថយន្តកុងតឺន័រមួយគ្រឿងខណៈកំពុងបត់ស្តាំ ស្រាប់តែមានរថយន្តបែនកង់៦ដឹកខ្សាច់មួយគ្រឿង បើកលឿនជ្រុលទៅបុកផ្ទប់បណ្តាលឲ្យកៀបជាប់គ្នាកាលពីវេលាម៉ោង២និង៣០នាទីរសៀល ថ្ងៃទី១៨ ខែសីហា ឆ្នាំ២០២២ នៅតាមផ្លូវជាតិលេខ៣ ត្រង់ចំណុចភូមិក្រាំងដូនទៃ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។ប្រជាពលរដ្ឋដែលបានឃើញហេតុការណ៍បានឲ្យដឹងថា មុនពេលកើតហេតុ រថយន្តកុងតឺន័រម៉ាក MITSUBISHI ពណ៌បៃតង ពាក់ស្លាកលេខ ភ្នំពេញ 3E-8933 អូសសណ្តោងរុឺម៉ក ពាក់ស្លាកលេខ ភ្នំពេញ 4A-5647 កំពុងបត់ស្តាំចូលផ្លូវបេតុងក្នុងភូមិ ភ្លាមនោះស្រាប់តែរថយន្តបែន ម៉ាកHINO ពណ៌ស ពាក់ស្លាកលេខ ចង្កូតស្តាំ PP-1510 ដឹកខ្សាច់ពេញរថយន្ត បើកតាមបណ្តោយផ្លូវជាតិលេខ៣ ក្នុងទិសដៅពីត្បូងទៅជើង ក្នុងល្បឿនលឿនចាប់ហ្វ្រាំងមិនទាន់ ក៏ជ្រុលទៅបុកផ្ទប់ជាមួយរថយន្តកុងតឺន័រ ពេញ​ទំហឹងបណ្តាលឲ្យកៀបជាប់គ្នាកណ្តាលផ្លូវ តែមិនបង្កឲ្យអ្នកណារងរបួសនោះទេ។  ក្រោយកេីតហេតុភាគីអ្នកបើកបររថយន្តទាំងពីរបានព្រមព្រៀងគ្នាហៅសមត្ថកិច្ចមកជួយអន្តរាគមន៍ដើម្បីជួយដោះស្រាយតាមនិតិវិធី ។សម្រួលដោយ ទៀង បុណ្ណរី