ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍បានលើកឡើងថា ការជំរុញអក្ខរកម្មឌីជីថល នឹងធ្វើឱ្យប្រសើរឡើងនៃការសិក្សាជំនាញឌីជីថល

ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍បានលើកឡើងថា ការជំរុញអក្ខរកម្មឌីជីថល នឹងធ្វើឱ្យប្រសើរឡើងនៃការសិក្សាជំនាញឌីជីថល ព្រមទាំងជួយគាំទ្រដល់ការអនុវត្តក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា ២០២២-២០៣៥។ ការលើកឡើងរបស់ឯកឧត្ដមរដ្ឋមន្រ្ដីនេះ ក្នុងពិធីបើកសន្និសីទស្តីពី “ការអភិវឌ្ឍជំនាញឌីជីថលនៅកម្ពុជា” កាលពីថ្ងៃទី១៤ ខែមិថុនា ឆ្នាំ២០២២ នៅមជ្ឈមណ្ឌលនវានុវត្តន៍នៃបណ្ឌិត្យសភាបច្ចេកវិទ្យាឌីជីថលកម្ពុជា(CADT)។ ឯកឧត្តមរដ្ឋមន្ត្រី ជា វ៉ាន់ដេត បានមានប្រសាសន៍ថា គោលដៅសំខាន់នៃវេទិកានេះគឺដើម្បីប្រមូលផ្តុំស្ថាប័នពាក់ព័ន្ធក្នុងវិស័យអប់រំ សម្រាប់ចូលផ្ដល់មតិយោបល់រៀបចំវគ្គបណ្តុះបណ្តាល និងកម្មវិធីសិក្សាជំនាញ ICT ឡើងវិញស្របតាមតម្រូវការ និងនិន្នាការវិវត្តន៍នៃបច្ចេកវិទ្យាពិភពលោក។ ឯកឧត្តមរដ្ឋមន្ត្រីបានស្នើដល់ស្ថាប័នពាក់ព័ន្ធទាំងអស់ ចូលរួមផ្តល់ធាតុចូលបន្ថែម លើសេចក្តីព្រាងគោលនយោបាយជាតិស្តីពីការអភិវឌ្ឍវិស័យឌីជីថល ២០៣០ ដែលគោលនយោបាយនេះ មានចក្ខុវិស័យ អភិវឌ្ឍន៍វិស័យឌីជីថលឱ្យក្លាយជាកម្លាំងចលករជំរុញល្បឿនបរិវត្តកម្មរដ្ឋាភិបាល សេដ្ឋកិច្ច និងសង្គមឌីជីថល ដើម្បីលើកកម្ពស់នវានុវត្តន៍ ឧត្តមភាពប្រកួតប្រជែងនៅលើឆាកអន្តរជាតិ និងការអភិវឌ្ឍប្រកបដោយម្ចាស់ការ ចីរភាព និងបរិយាប័ន្ន។ សូមជម្រាបជូនថា សន្និសីទនេះ រៀបចំឡើងក្នុងគោលបំណងដើម្បីឈ្វេងយល់ពីស្ថានភាពបច្ចុប្បន្ន បញ្ហាប្រឈម និងកាលានុវត្តភាពលើការកសាងមូលធនមនុស្សឌីជីថល ដើម្បីស្វែងរក ដំណោះស្រាយ និងឧត្តមានុវត្តន៍ក្នុងការចូលរួមពង្រឹងគុណភាពបណ្ដុះបណ្តាលជំនាញបច្ចេកវិទ្យាឌីជីថល ឆ្លើយតបទៅនឹងតម្រូវការទីផ្សារបច្ចុប្បន្ន និងអនាគត៕សម្រួលដោយ ទៀង បុណ្ណរី