អាជ្ញាធរមីន ចុះអនុស្សរណៈជាមួយតំបន់សេដ្ឋកិច្ចពិសេស Manhattan និងក្រុមហ៊ុន MedTecs Group ដើម្បីគាំទ្រដល់ការងារបោសសម្អាតមីនមនុស្សធម៌នៅកម្ពុជា

ចេញផ្សាយ ថ្ងៃទី 9 ខែ មេសា ឆ្នាំ 2022 198

ខេត្តស្វាយរៀង ថ្ងៃទី០៨ ខែមេសា ឆ្នាំ២០២២

អាជ្ញាធរមីន បានចុះហត្ថលេខាលើអនុស្សរណៈនៃការយោគយល់គ្នាជាមួយតំបន់សេដ្ឋកិច្ចពិសេស Manhattan និងក្រុមហ៊ុន MedTecs Group ដើម្បីចូលរួមគាំទ្រដល់ការងារបោសសម្អាតមីនមនុស្សធម៌នៅកម្ពុជា។ ក្នុងពិធីចុះហត្ថលេខាលើអនុស្សរណៈ បានធ្វើឡើងដោយមានការអញ្ជើញចូលរួមពីឯកឧត្ដមទេសរដ្ឋមន្រ្ដី លី ធុជ អនុប្រធានទី១ អាជ្ញាធរមីន និងលោក Clement Yang ប្រធានតំបន់សេដ្ឋកិច្ចពិសេស Manhattan ហើយចុះហត្ថលេខានេះ អាជ្ញាធរមីនតំណាងដោយ ឯកឧត្ដម ព្រំ សុភមង្គល អគ្គលេខាធិការអាជ្ញាធរមីន និងតំបន់សេដ្ឋកិច្ចពិសេស Manhattan និងក្រុមហ៊ុន MedTecs Group តំណាងដោយ លោក Larry Kao នាយកប្រចាំប្រទេស នាព្រឹកថ្ងៃទី០៨ ខែមេសា ឆ្នាំ២០២២ នៅក្រុងបាវិត ខេត្ដស្វាយរៀង។ នេះបើតាមផេកហ្វេសប៊ុកផ្លូវការរបស់ឯកឧត្ដមទេសរដ្ឋមន្រ្ដី លី ធុជ។

ឯកឧត្ដមទេសរដ្ឋមន្រ្ដី លី ធុជ បានថ្លែងអំណរគុណ និងវាយតម្លៃខ្ពស់ចំពោះការដឹកនាំលោក Clement Yang និងលោក Larry Kao សម្រាប់តំបន់សេដ្ឋកិច្ចពិសេស Manhattan និងក្រុមហ៊ុន MedTecs Group ដែលបានចូលរួមផ្តល់ឱកាសការងារយ៉ាងច្រើន និងលើកកម្ពស់ជីវភាពរស់នៅឱ្យកាន់តែប្រសើរឡើងដល់ប្រជាជនខ្មែរ ជាពិសេសបានចូលរួមប្រែក្លាយតំបន់ស្ងប់ស្ងាត់ និងវាលស្រែនៅក្រុងបាវិត ទៅជាតំបន់សម្បូរទៅដោយរោងចក្រ មានភាពអ៊ូអរ និងមានការអភិវឌ្ឍន៍ដូចសព្វថ្ងៃ។ ឯកឧត្ដមទេសរដ្ឋមន្រ្ដីបានលើកឡើងថា គ្រាន់តែតំបន់សេដ្ឋកិច្ចពិសេស Manhattan មានកម្មករធ្វើការប្រមាណជាង ៣៥ ០០០ នាក់ និងតំណាងឱ្យការនាំចេញប្រមាណ ៦ភាគរយ នៃការនាំចេញទូទាំងប្រទេស។

តែទោះបីយ៉ាងណា ឯកឧត្ដមទេសរដ្ឋមន្រ្ដីបានបន្ដថា ការវិនិយោគទាំងនេះបានដំណើរការជោគជ័យ គឺដោយសារការយកចិត្តទុកដាក់ខ្ពស់ និងការដឹកនាំ របស់សម្តេចតេជោនាយករដ្ឋមន្រ្តី ដែលបាននាំមកនូវសុខសន្តិភាព សន្តិសុខ និងស្ថិរភាពនយោបាយពាសពេញផ្ទៃប្រទេស មិនត្រឹមតែប៉ុណ្ណោះរាជរដ្ឋាភិបាលកម្ពុជា បានបង្កើតនូវឱកាសវិនិយោគយ៉ាងច្រើនជាមួយនឹងកម្លាំងពលកម្មសម្បូរបែបសម្រាប់ការទាក់ទាញនិងការសម្រច ចិត្តរបស់អ្នកវិនិយោគគិន។ ជាមួយគ្នានេះ ឯកឧត្ដមទេសរដ្ឋមន្រ្ដីបានបន្ថែមថា សុខសុវត្ថិភាពសម្រាប់ការវិនិយោគ ក៏មានការចូលរួមធានាពីការងារបោសសម្អាតមីន និងសំណល់ជាតិផ្ទុះពីសង្រ្គាមផងដែរ ដែលរាជរដ្ឋាភិបាលកម្ពុជាបានដាក់ចេញនូវចក្ខុវិស័យវែងឆ្ងាយ និងច្បាស់លាស់ ក្នុងគោលដៅបញ្ចប់ការគំរាមដោយសារគ្រាប់មីននៅកម្ពុជា ហើយប្រសិនបើយើងរួបរួមគ្នា ឆ្នាំ២០២៥ ខាងមុខ នឹងគ្មានវត្តមានគ្រាប់មីន និងគ្មានអ្នកគ្រោះថ្នាក់ដោយសារគ្រាប់មីនបន្តទៀតនៅកម្ពុជាឡើយ៕សម្រួលដោយ ទៀង បុណ្ណរី